കൊയിലാണ്ടി: കുറുവങ്ങാട് സൗത്ത് യുപി. സ്‌കൂള്‍ മൂന്നാം ക്ലാസ് വിദ്യാര്‍ഥിയായ ഋഥയ് എസ്. ഗോവിന്ദ് തന്‍റെ ഒമ്പതാം പിറന്നാള്‍ ആഘോഷിച്ചത് പഠിക്കുന്ന സ്‌കൂളിലെ ലൈബ്രറിക്ക് അലമാര സമര്‍പ്പിച്ചുകൊണ്ട്.
നഗരസഭയിലെ സ്‌കൂളുകളിലെ ലൈബ്രറികളില്‍ പരിമിത സൗകര്യം മാത്രമായതിനാല്‍, ഇത്തരം പ്രവൃത്തികള്‍ മറ്റുള്ള വിദ്യാര്‍ഥികളും ഏറ്റെടുക്കുകയാണെങ്കില്‍ സ്‌കൂള്‍ ഗ്രന്ഥശാലകള്‍ക്ക് മുതല്‍ക്കൂട്ടാവും എന്ന പ്രതീക്ഷയാണ് നഗരസഭ വിദ്യാഭ്യാസ സ്ഥിരംസമിതി ചെയര്‍മാന്‍ പദവി വഹിക്കുന്ന ഋഥയ് യുടെ അച്ഛന്‍ കെ. ഷിജുവിനുള്ളത്.
മുന്‍ നഗരസഭ വൈസ്‌ചെയര്‍മാന്‍ യുകെഡി. അടിയോടി അലമാര സമര്‍പ്പണ പരിപാടി ഉദ്ഘാടനം ചെയ്തു. നഗരസഭാംഗം എ.കെ. വീണ അദ്ധ്യക്ഷത വഹിച്ചു. കെ. ഷിജു, പ്രധാനാധ്യാപിക എം. സുലൈഖ, ഡി.കെ. ബിനു, ആര്‍ .കെ രാജന്‍, കെ.പി. ഹാസിഫ്, ആര്‍ . സത്യഭാമ, സ്‌കൂള്‍ ലീഡര്‍ മുഹമ്മദ് ഷാദ്, ശശി കോലോത്ത്, ഒ. ഗിരി എന്നിവര്‍ പ്രസംഗിച്ചു.
