തൊടുപുഴ: സംഗീത ലോകത്തേയ്ക്ക് ചുവടുവയ്പ്പ് നടത്തുന്ന കൊച്ചു ഗായികയ്ക്ക് രാഷ്ട്രീയത്തി ലെ ഗായകന്റെ അഭിനന്ദനവും അനുഗ്രഹവും. യു.പി വിഭാഗം ലളിതഗാന മത്സരത്തില്‍ ഒന്നാം സ്ഥാനം നേടിയ ആവണി പി. ഹരീഷിനെയാണ് പി.ജെ ജോസഫ് എംഎല്‍എ അഭിനന്ദിച്ചത്. പി.ജെ ജോസഫിനു വേണ്ടിയും പി.സി. ജോര്‍ജിനു വേണ്ടിയും നിയമസഭ തെരഞ്ഞെടുപ്പ് വേളയില്‍ ആവണി ഗാനങ്ങള്‍ ആലപിച്ചിട്ടുണ്ട്.
പൈതല്‍ എന്ന ക്രിസ്തീയ ആല്‍ബത്തില്‍ ശ്രേയക്കൊപ്പവും ആവണി പാടിയിട്ടുണ്ട്. അറക്കുളം ദേവരാജസ്വാമിയുടെ ശിക്ഷണത്തിലാണ് സംഗീതം അഭ്യസിക്കുന്നത്. ജയ്‌റാണി ഇംഗ്ലീഷ് മീഡിയം സ്‌കൂളിലെ അഞ്ചാം ക്ലാസ് വിദ്യാര്‍ഥിനിയായ ആവണി പോത്തനാശേരിയില്‍ ഹരീഷ്– മജ്ഞുഷ ദമ്പതികളുടെ മകളാണ്.
