തൃശൂർ: മോട്ടോർ വാഹന നിയമ ഭേദഗതികൾ നടപ്പാക്കുന്നതു താത്കാലികമായി നിർത്തി വച്ചെങ്കിലും നിയമം ലംഘിച്ച് വാഹനമോടിക്കുന്നവർ ഏറെ കുറഞ്ഞതായി കണക്കുകൾ. ഇവരിൽനിന്ന് ഈടാക്കിയിരുന്ന പിഴത്തുകയിലും പത്തുലക്ഷത്തോളം രൂപയുടെ കുറവാണ് കഴിഞ്ഞ മാസം രേഖപ്പെടുത്തിയിട്ടുള്ളത്.
ഓഗസ്റ്റിൽ 22,03,950 രൂപയാണ് അഞ്ച് ആർടിഒ എൻഫോഴ്സ്മെന്റ് സ്ക്വാഡുകൾ ജില്ലയിലെ വിവിധ സ്ഥലങ്ങളിൽനിന്നു പിടിച്ചെടുത്തത്. ടാക്സ് ഇനത്തിൽ 1,80,000 രൂപയും ആർടി ഓഫീസിനു ലഭിച്ചു. എന്നാൽ കഴിഞ്ഞമാസം പിടിച്ചെടുത്ത തുക വെറും 8,16,850 രൂപ മാത്രമാണ്. ടാക്സ് ഇനത്തിൽ ലഭിച്ചത് 28,800 രൂപ മാത്രം. ജില്ലയിൽ കഴിഞ്ഞ മാസത്തെ കണക്കെടുപ്പിൽ നിയമം തെറ്റിച്ച് വാഹനമോടിച്ച വെറും 534 കേസുകൾ മാത്രമാണ് ഉണ്ടായിട്ടുള്ളത്.
ഓഗസ്റ്റിൽ ഇത്തരത്തിൽ 2,502 കേസുകളാണ് ജില്ലയിൽ ഉണ്ടായത്.സെപ്റ്റംബർ ഒന്നുമുതൽ മോട്ടോർ വാഹന നിയമങ്ങൾ പാലിച്ചില്ലെങ്കിൽ കനത്ത പിഴ ഈടാക്കുമെന്ന ഉത്തരവ് ആദ്യ ദിനങ്ങളിൽ നടപ്പിലാക്കിയതോടെയാണ് വാഹനം ഉപയോഗിക്കുന്നവർ നിയമം പാലിക്കാൻ ശ്രദ്ധിച്ചത്.
ഓഗസ്റ്റിൽ ഹെൽമറ്റ് ധരിക്കാതെ വാഹനമോടിച്ച കേസുകൾ 604 ആയിരുന്നെങ്കിൽ സെപ്റ്റംബറിൽ അത് 83 ആയി ചുരുങ്ങി. സീറ്റ് ബെൽറ്റ് ധരിക്കാതെ വാഹനമോടിച്ച 374 കേസുകളാണ് ഓഗസ്റ്റിൽ ഉണ്ടായത്. എന്നാൽ സെപ്റ്റംബറിൽ ഇത് 21 കേസുകൾ മാത്രമായി. ഓഗസ്റ്റിൽ ടാക്സ് അടയ്ക്കാത്ത 196 കേസുകൾ ഉണ്ടായെങ്കിൽ സെപ്റ്റംബറിൽ അത് 72 ആയി ചുരുങ്ങി.
