കോഴിക്കോട്: മഴക്കാല പൂര്‍വശുചീകരണത്തിന് ആരോഗ്യവകുപ്പിന് മുമ്പേ ഉണര്‍ന്ന് പോലീസ്. മണ്‍സൂണ്‍ ആരംഭിക്കാന്‍ ദിവസങ്ങള്‍ മാത്രം അവശേിക്കേ ബോധവത്കരണവുമായാണ് പോലീസ് സജീവമായത്. ഔദ്യോഗിക ഫേസ്ബുക്ക് പേജിലൂടെ മഴക്കാല പൂര്‍വശുചീകരണത്തിന്‍റെ പ്രധാന്യം വ്യക്തമാക്കികൊണ്ടുള്ള പോലീസിന്‍റെ പോസ്റ്റ് ഇതിനകം മറ്റു മൂഹമാധ്യമങ്ങളും ഏറ്റെടുത്തു.
മഴയെ തുടര്‍ന്നുള്ള വെള്ളക്കെട്ടും സാംക്രമിക രോഗങ്ങളും മുന്നില്‍കണ്ട് കൊണ്ടാണ് ശുചീകരണ പ്രവര്‍ത്തനങ്ങള്‍ക്കായി പോലീസും മുന്നിട്ടിറങ്ങിയത്. റസിഡന്‍റ് അസോസിയേഷനുകള്‍, ക്ലബുകള്‍, മറ്റ് സന്നദ്ധ സംഘടനകള്‍ എന്നിവയുടെ പങ്കാളിത്തത്തോടെ ബോധവല്‍ക്കരണം നടത്തി ശുചിത്വ പ്രവര്‍ത്തനങ്ങള്‍ ഏകോപിപ്പിക്കാമെന്നാണ് പോസ്റ്റില്‍ പറയുന്നത്.
ചന്തകള്‍ , വ്യാപാര കേന്ദ്രങ്ങള്‍ , സര്‍ക്കാര്‍, സ്വകാര്യ സ്ഥാപനങ്ങള്‍, കല്യാണമണ്ഡപങ്ങള്‍, കശാപ്പ് ശാലകള്‍ , കവലകള്‍ തുടങ്ങിയ ഇടങ്ങള്‍ കേന്ദ്രീകരിച്ച് മാലിന്യം കൂടിക്കിടക്കുന്ന സ്ഥലങ്ങള്‍ കണ്ടെത്തി അവയെ നിര്‍മ്മാര്‍ജ്ജനം ചെയ്യാം. പ്ലാസ്റ്റിക്, ചില്ല്, അജൈവ മാലിന്യങ്ങള്‍ ശേഖരിക്കുകയും യഥാവിധി സംസ്‌കരിക്കുകയും ചെയ്യുക. അഴുക്കുചാലുകളില്‍ കുമിഞ്ഞുകിട കിടക്കുന്ന മാലിന്യങ്ങള്‍ നീക്കം ചെയ്ത് നീരൊഴുക്ക് സുഗമമാക്കുക.
മലമ്പനി ,മന്ത് ,ഡെങ്കിപ്പനി, ചിക്കന്‍ ഗുനിയ മുതലായവയാണ് പ്രധാനപ്പെട്ട മഴക്കാല രോഗങ്ങള്‍. മഴക്കാലാരോഗങ്ങള്‍ക്ക് പ്രധാന കാരണം മഴക്കാലത്ത് ഉണ്ടാകുന്ന വെള്ളക്കെട്ടും, കൊതുകുകള്‍ മുട്ടയിട്ട് പെരുകുന്നതുമാണ്. ശുചിത്വമില്ലായ്മയും പരിസരമലിനീകരണവും മൂലമാണ് കൊതുകുകള്‍ മുട്ടയിട്ട് പെരുകുന്നത്. കൊതുകുകള്‍ക്ക് അനുകൂലമായ അന്തരീക്ഷം തടഞ്ഞ് അവയുടെ പെറ്റുപെരുകലിനു ഇടയാവാതെ വെള്ളം കെട്ടിനില്‍ക്കുന്നത് തടഞ്ഞ് പരിസരം വൃത്തിയായി സൂക്ഷിക്കുക.
കൊതുകുജന്യ രോഗങ്ങള്‍ തടയുന്നതിന് കൊതുകിന്‍റെ ഉറവിടം നശിപ്പിക്കുകയാണ് ഏക പോംവഴി. അലസമായി ഉപേക്ഷിച്ചിരിക്കുന്ന പാത്രങ്ങള്‍, ടയറുകള്‍ , ഉപയോഗശൂന്യമായ ജലയാനങ്ങള്‍ തുടങ്ങിയവ കൊതുകു വളര്‍ത്തുകേന്ദ്രങ്ങളാകുന്നത് തടയണം. അഴുക്കുചാലുകളിലും മറ്റും കെട്ടിനില്‍ക്കുന്ന വെള്ളം കൊതുക് മുട്ടയിട്ട് പെരുകുന്നതിന് ഇടയാക്കുന്നു.
ടെറസ്സിലെയും ചെടിച്ചട്ടികളിലെയും വെള്ളക്കെട്ടുകള്‍ ഒഴിവാക്കുക, വീടിനു സമീപത്തെ പുല്ലുകളും കുറ്റിച്ചെടികളും വെട്ടി നശിപ്പിക്കുക. കെട്ടി നില്‍ക്കുന്ന വെള്ളത്തില്‍ ഡീസല്‍ , മണ്ണെണ്ണ എന്നിവ ഒഴിക്കുന്നത് കൊതുകുകളുടെ ലാര്‍വകളെ നശിപ്പിക്കും. വാട്ടര്‍ ടാങ്കുകളും, സെപ്റ്റിക് ടാങ്കുകളുടെ ഓപണിംഗുകളും വല ഉപയോഗിച്ച് മൂടാന്‍ ശ്രമിക്കണം. കിണറുകളിലും മറ്റു ചെറിയ ജലാശയങ്ങളിലും ഗപ്പി മീനുകളെ നിക്ഷേപിക്കാം.
വായനശാലകള്‍,വിദ്യാലയങ്ങള്‍ , അംഗന്‍വാടികള്‍, നഴ്‌സറികള്‍ തുടങ്ങിയവയുടെ പരിസരങ്ങളും ശിചിയാക്കുക. വീടിനും പരിസരത്തുമുള്ള ചപ്പുചവറുകളും ഭക്ഷണാവശിഷ്ടങ്ങളും മറ്റും നശിപ്പിച്ച് എലി പെരുകുന്നത് തടയാം. റബ്ബര്‍ തോട്ടങ്ങള്‍, മറ്റ് കൃഷിത്തോട്ടങ്ങള്‍ എന്നിവിടങ്ങളും ശ്രദ്ധിക്കുക.അന്യസംസ്ഥാന തൊഴിലാളികളുടെ ക്യാമ്പുകളും ശുചിത്വ പ്രവര്‍ത്തനങ്ങളില്‍ പ്രത്യേക പ്രാധാന്യം അര്‍ഹിക്കുന്നു.
തോടുകളിലെയും കനാലുകളിലെയും മാലിന്യങ്ങള്‍ നീക്കും ചെയ്ത് നീരൊഴുക്ക് സുഗമമാക്കാം. അജൈവ മാലിന്യങ്ങള്‍ ശേഖരിക്കുകയും സംസ്‌കരിക്കുകയും ചെയ്യുന്നതിന് പ്രത്യേക പ്രാധ്യാന്യം നല്‍കുക.
