സ്വന്തം ലേഖകന്‍
കോഴിക്കോട്: ജില്ലാ പോലീസ് മേധാവിമാരെയും പോലീസുകാരേയും നിയമം പഠിപ്പിക്കാന്‍ ജില്ലാ അടിസ്ഥാനത്തില്‍ ലീഗല്‍സെല്‍ ആരംഭിക്കുന്നു. ഓരോ പോലീസ് ജില്ലകളിലേയും ജില്ലാ പോലീസ് മേധാവിമാരുടെ കാര്യാലയത്തിലാണു ലീഗല്‍ സെല്‍ ആരംഭിക്കാന്‍ ഡിജിപി ലോക്‌നാഥ് ബഹ്‌റ ഉത്തരവിറക്കിയത്.
നിയമത്തില്‍ ബിരുദവും ബിരുദാനന്തരബിരുദവും നിയമപരിഞ്ജാനമുള്ള രണ്ടുപേരെയാണ് സെല്ലില്‍ ഉള്‍പ്പെടുത്തുന്നത്. ജില്ലാ പോലീസ് മേധാവിമാര്‍ നിയമത്തിലുള്ള അറിവും എഴുതാനുള്ള പാടവവുമുള്ളവരെ കണ്ടെത്തിയാണ് സെല്ലില്‍ നിയമിക്കേണ്ടത്. അഡ്മിനിസ്‌ട്രേഷന്‍ ഡിവൈഎസ്പിക്കാണ് സെല്ലിന്‍റെ പൂര്‍ണ ചുമതല നല്‍കേണ്ടതെന്നും ഡിജിപി നിര്‍ദേശം നല്‍കി.
വിവിധ പോലീസ് സ്‌റ്റേഷനുകളിലായി രജിസ്റ്റര്‍ ചെയ്യുന്ന കേസുകളുമായി ബന്ധപ്പെട്ട് വിവിധ കോടതികള്‍, ട്രിബ്യൂണലുകള്‍, കമ്മീഷനുകള്‍ എന്നീ വിഭാഗങ്ങള്‍ക്ക് സത്യവാങ്മൂലങ്ങള്‍, എതിര്‍ സത്യവാങ്മൂലങ്ങള്‍, റിപ്പോര്‍ട്ടുകള്‍ എന്നിവ പോലീസ് ഫയല്‍ ചെയ്യാറുണ്ട്. ഇത്തരത്തില്‍ സത്യവാങ്മൂലങ്ങളും റിപ്പോര്‍ട്ടുകളും കോടതിക്കും മറ്റും സമര്‍പ്പിക്കുമ്പോള്‍ ഇത് വേണ്ടത്ര ശ്രദ്ധയോടെ കൈകാര്യം ചെയ്യുന്നില്ലെന്നും ഡിജിപിയുടെ ഉത്തരവിലുണ്ട്.
കോടതി നിര്‍ദേശങ്ങള്‍ ഉചിതമായി പാലിക്കാത്തതിനെ തുടര്‍ന്നു പോലീസ് മേധാവിയുള്‍പ്പെടെയുള്ള ഉയര്‍ന്ന പോലീസുദ്യോഗസ്ഥര് കോടതയില്‍ നേരിട്ട് ഹാജരാകേണ്ട അവസ്ഥയാണുള്ളത്. തുടര്‍ന്ന് കോടതിയുടെ വിമര്‍ശനവും പോലീസിന് കേള്‍ക്കാണ്ടതായും വരുന്നുണ്ട്.
ജില്ലാ പോലീസ് മേധാവിമാര്‍ ജാഗ്രത പുലര്‍ത്തിയാല്‍ ഇത്തരത്തിലുള്ള കോടതിയുടെ വിമര്‍ശനങ്ങള്‍ ഒഴിവാക്കാം. എന്നാല്‍ നിര്‍ദേശങ്ങള്‍ നല്‍കിയിട്ടും ഇത് ഫലപ്രദമാവുന്നില്ല. ഈ സാഹചര്യത്തിലാണ് പോലീസുകാരെ നിയമവും മറ്റും പഠിപ്പിക്കുന്നതിനായി ലീഗല്‍ സെല്‍ ആരംഭിക്കാന്‍ തീരുമാനിച്ചത്.
പോലീസ് കക്ഷിയായുള്ള കേസുകളില്‍ സത്യവാങ്മൂലങ്ങള്‍ യഥാസമയം സമപ്പിക്കുന്നുണ്ടെന്നത് നിരീക്ഷിക്കേണ്ട ചുമതലയാണ് പ്രധാനമായും ലീഗല്‍ സെല്ലിനുള്ളത്. ഓരോ കോടതി കാര്യവും സംബന്ധിച്ച് സ്വീകരിക്കേണ്ട നടപടിയെ കുറിച്ചും ലീഗല്‍ സെല്‍ ജില്ലാ പോലീസ് മേധാവിയെ അറിയിക്കണം. കോടതി രേഖകളും മറ്റും ഡിജിറ്റിലായി സൂക്ഷിക്കണം.
കേസിന്‍റെ സംഗ്രഹം, കേസിന്‍റെ അടുത്ത പോസറ്റിംഗ് തിയതി, സത്യവാങ്മൂലമോ, സ്‌റ്റേറ്റ്‌മെന്‍റോ നല്‍കേണ്ട തിയതി, കോടതി പോലീസിന് നല്‍കിയ ഇടക്കാല നിര്‍ദേശങ്ങളുടേയും ഉത്തരവുകളുടേയും വിവരങ്ങള്‍ എന്നിവ ഡിജിറ്റില്‍ ഡാറ്റയില്‍ ഉണ്ടായിരിക്കണം. പോലീസുദ്യോഗസ്ഥര് ജോലിക്ക് ആവശ്യമായ നിയമ ജേര്‍ണലുകളും വിധിന്യായങ്ങളും വായിച്ച് മനസിലാക്കണം.
ഇതിനുള്ള ഈ സാഹചര്യം ലീഗല്‍ സെല്‍ ഒരുക്കണം. കൂടാതെ ജില്ലാ പോലീസ് മേധാവിമാരുടെ ഓരോ മാസത്തേയും ക്രൈംകോണ്‍ഫറന്‍സില്‍ പോലീസിനെ കുറിച്ചുള്ള വിധിന്യായങ്ങള്‍ നിയമ നിര്‍മാണങ്ങള്‍ സംബന്ധിച്ചു ലഘുവിവരങ്ങള്‍ നല്‍കണമെന്നും ഇത്തരം നടപടികള്‍ സ്വീകരിച്ചതുമായി ബന്ധപ്പെട്ടുള്ള റിപ്പോര്‍ട്ടുകള്‍ രണ്ടാഴ്ചക്കുള്ളില്‍ എല്ലാ പോലീസ് മേധാവിമാരും സമര്‍പ്പിക്കേണ്ടതാണെന്നും ഡിജിപി അയച്ച സര്‍ക്കുലറില്‍ നിര്‍ദേശിച്ചിട്ടുണ്ട്.
