കൊല്ലം: കൊല്ലം അഞ്ചലില്‍ കാന്‍സര്‍ രോഗിയായ ഓട്ടോ ഡ്രൈവര്‍ക്ക് പോലീസിന്‍റെ ക്രൂരമര്‍ദനം. അഞ്ചൽ കരുകോൺ സ്വദേശി രാജേഷിനാണ് മർദനമേറ്റത്. വാഹന പരിശോധനയ്ക്കിടെ ഓട്ടോ നിര്‍ത്തിയില്ലെന്ന് ആരോപിച്ചായിരുന്നു ക്രൂരത. കാന്‍സര്‍ ബാധിതനായ രാജേഷിന്‍റെ തോളെല്ലിന് ഗുരുതരപരുക്കേറ്റു. ശനിയാഴ്ച വൈകിട്ടായിരുന്നു പോലീസ് അതിക്രമം.
അഞ്ചല്‍ ജംഗ്ഷനു സമീപത്താണ് പരിശോധനയ്ക്കായി ഹോം ഗാര്‍ഡ് കൈകാണിച്ചത്. മുന്നില്‍ മറ്റൊരു വാഹനം ഉള്ളതിനാല്‍ വണ്ടി മുന്നോട്ട് നീക്കിയാണ് നിർത്തിയത്. എന്നാൽ ഹോം ഗാര്‍ഡ് ഉടനെ വണ്ടിയില്‍ കയറി താക്കോല്‍ ഊരിയെടുക്കുകയായിരുന്നെന്ന് രാജേഷ് പറയുന്നു. തുടര്‍ന്ന് വണ്ടിയുമായി അഞ്ചല്‍ പോലീസ് സ്റ്റേഷനിലേക്ക് കൊണ്ടുപോയി.
സ്‌റ്റേഷനില്‍ എത്തിയ ഉടനെ അകത്തേക്ക് തള്ളിയപ്പോള്‍ തല ചുവരിലിടിച്ചു. കൈകളിൽ വിലങ്ങുവച്ച് ക്രൂരമായി മര്‍ദ്ദിച്ചു. ക്യാന്‍സര്‍ രോഗിയാണെന്ന് ആവര്‍ത്തിച്ച് പറഞ്ഞിട്ടും കേള്‍ക്കാന്‍ പോലീസ് തയാറായില്ലെന്നും രാജേഷ് പറയുന്നു.
