പഴയങ്ങാടി: അൽഫത്തീബി ജ്വല്ലറി കവർച്ചക്കാരെ പിടികൂടിയ പോലീസ് ഓഫീസർമാർക്കും അന്വേഷണ സംഘാംഗങ്ങൾക്കും പഴയങ്ങാടി പൗരാവലിയുടെ ആദരം. തളിപ്പറന്പ് ഡിവൈഎസ്പി കെ.വി. വേണുഗോപാൽ, പഴയങ്ങാടി എസ്ഐ പി.എ. ബിനുമോഹൻ എന്നിവരെയും അന്വേഷണ സംഘത്തിലെ പോലീസ് ഉദ്യോഗസ്ഥ രേയുമാണ് ആദരിച്ചത്.
ടി.വി. രാജേഷ് എംഎൽഎ ഉദ്ഘാടനം ചെയ്തു. മാടായി പഞ്ചായത്ത് പ്രസിഡന്‍റ് കെ. ആബിദ അധ്യക്ഷത വഹിച്ചു. വി. വിനോദ്, ഏഴോം പഞ്ചായത്ത് പ്രസിഡന്‍റ് ഡി. വിമല, ആർ. അജിത, എം.പി. ഉണ്ണികൃഷ്ണൻ, കെ.വി. രാമചന്ദ്രൻ, കെ. പദ്മനാഭൻ, പി.എം. ഹനീഫ്, പി.വി. അബ്‌ദുള്ള എന്നിവർ അനുമോദിച്ചു. അന്വേഷണത്തിന് നേതൃത്വം നൽകിയ ഓഫീസർമാരേയും സംഘാംഗങ്ങളെയും സൈബർസെൽ ഉൾപ്പെടെയുള്ള എല്ലാ സ്ക്വാഡ് അംഗങ്ങളേയും ടി.വി. രാജേഷ് എംഎൽഎ ഉപഹാരം നൽകി ആദരിച്ചു.
പഴയങ്ങാടിയിലെ മാധ്യമപ്രവർത്തകരേയും ചടങ്ങിൽ ആദരിച്ചു. പഴയങ്ങാടി ബസ്‌സ്റ്റാൻഡ് പരിസരത്ത് നിന്ന് വാദ്യമേളങ്ങളുടെ അകന്പടിയോടെ ജനപ്രതിനിധികളും നൂറുകണക്കിനു പൗരാവലിയും സ്വീകരണത്തിൽ പങ്കെടുത്തു. പൊന്നാടണയിച്ചും ഷാളുകളിട്ടും പൂമാലിട്ടും വ്യാപാരികളും തൊഴിലാളികളും ചേർന്ന് പോലീസുകാരെ അനുമോദിച്ചു.
