കോവിഡ് രൂക്ഷമായതിനെത്തുടര്‍ന്ന് പ്രഖ്യാപിച്ച ലോക്ഡൗണ്‍ പലരുടെയും ജീവിതം ദുസ്സഹമാക്കിത്തീര്‍ത്തു. തൊഴിലും വരുമാനവുമില്ലാതെ നിരവധി ആളുകളാണ് പട്ടിണിയിലായത്.
തെരുവില്‍ ഉപേക്ഷിച്ച നായ്ക്കളുടെ അഭയ കേന്ദ്രമായ സുനിതയുടെയും ഭര്‍ത്താവ് ഷിന്റോയുടെയും അവസ്ഥ കൂടുതല്‍ പരിതാപകരമാണ്.
ഓലക്കുടിലിന് ചുറ്റും ടാര്‍പോളിന്‍ വിരിച്ച കൂടാരങ്ങളിലും കൂടുകളിലുമായി 87 തെരുവ് നായ്ക്കളെയാണ് ഇവര്‍ പോറ്റുന്നത്.
കഴിഞ്ഞ ഒന്നര വര്‍ഷമായി ഇവയ്ക്കു തീറ്റ നല്‍കാന്‍ ബുദ്ധിമുട്ടു നേരിടുന്നതായി പത്താംകല്ല് ബീച്ച് റോഡിലെ മാങ്ങാട്ട് വീട്ടില്‍ സുനിതയുടെയും ഷിന്റോയുടെയും പരാതി.
ഒരു ചാക്ക് അരി രണ്ട് ദിവസത്തേക്ക് തികയില്ല. മാര്‍ക്കറ്റില്‍ മാംസ വില്‍പന ഇല്ലാതായതും തിരിച്ചടിയായി. തെരുവില്‍ കഴിയുന്ന നായ്ക്കളെ വീട്ടിലെത്തിച്ചു സംരക്ഷിക്കുകയാണ് ഇവരുടെ രീതി.
വീടുകളില്‍ നിന്ന് ഉപേക്ഷിച്ച നിലയില്‍ കണ്ടെത്തിയ ജര്‍മന്‍ ഷെപ്പേഡ് തുടങ്ങിയ ഇനത്തിലുള്ള നായ്ക്കളും കൂട്ടത്തിലുണ്ട്. പരിചയമുള്ള വെറ്ററിനറി ഡോക്ടര്‍മാര്‍ സൗജന്യമായി മരുന്നുകളും നിര്‍ദേശങ്ങളും നല്‍കി സഹായിക്കും.
ഗുരുതര അസുഖം ബാധിച്ചാല്‍ ജില്ലാ വെറ്ററിനറി ആശുപത്രിയിലെത്തിച്ച് ചികിത്സിക്കും. ഇതിനെല്ലാം പണം കണ്ടെത്തണം.
ദിവസവും നായ്ക്കള്‍ക്കു ഭക്ഷണവും ആവശ്യത്തിനുള്ള മരുന്നും ലഭ്യമാക്കാനുള്ള ശ്രമത്തിനു പഞ്ചായത്ത് ഉള്‍പ്പെടെ അധികൃതരെ സമീപിച്ചെങ്കിലും പദ്ധതിയില്ലെന്നാണു മറുപടി. സുമനസ്സുകള്‍ സഹായിച്ചാല്‍ മാത്രമേ ഇനി ഇവര്‍ക്ക് മുമ്പോട്ടു പോകാനാവൂ…
