കോട്ടയം: പോത്തിനെ മരത്തില്‍ കെട്ടിത്തൂക്കി കൊന്ന നിലയിൽ. നാടിനെ ഞെട്ടിച്ച സംഭവം മണര്‍കാട് മാലത്തിനടുത്ത്. ഒരു വയസുള്ള പോത്താണ് ചത്തത്. അരീപ്പറമ്പ് മൂലക്കുളം രാജുവിന്‍റെ പോത്തിനെയാണ് ചത്ത നിലയില്‍ കണ്ടെത്തിയത്.
വീടിനു സമീപമുള്ള മരത്തിലാണ് പോത്തിനെ തീറ്റ തിന്നാൻ കെട്ടിയിട്ടത്. പിന്നീട് അഴിഞ്ഞുപോയ പോത്തിനെ അന്വേഷിച്ച് നടക്കുന്നതിനിടെയാണ് സമീപത്തെ റബ്ബര്‍ തോട്ടത്തിലെ മരത്തില്‍ തൂങ്ങിയ നിലയില്‍ കണ്ടെത്തിയത്.
ഉയരമുള്ള മരത്തിന്‍റെ ശിഖരത്തിൽ കയർ കുടുക്കി മൂക്കുകയറും കഴുത്തിലെ കയറിലും കുരുക്കിട്ട് കെട്ടിയ നിലയിലായിരുന്നു. നാട്ടുകാരാണ് ആദ്യം പോത്തിനെ ചത്തനിലയിൽ കണ്ടെത്തിയത്
ഉടമയുടെ പരാതിയില്‍ പോലീസ് കേസെടുത്ത് അന്വേഷണം ആരംഭിച്ചു. പോത്തിന്‍റെ പോസ്റ്റുമോര്‍ട്ടം നടത്തുമെന്ന് പോലീസ് അറിയിച്ചു.
