പയ്യന്നൂര്‍: വിരണ്ട് ഓടിയ പോത്തുകളുടെ ദേഹത്ത് ബൈക്കിടിച്ചുണ്ടായ രണ്ട് അപകടങ്ങളിലായി രണ്ടുപേര്‍ക്ക് പരിക്ക്. രാമന്തളി പുന്നക്കടവിലെ അല്‍ക്ക ഹോട്ടലുടമ പുരുഷോത്തമനും(47)പാലക്കോട്ടെ മുസ്ലിയാര്‍ വീട്ടില്‍ അദിനാനുമാണ്(24)പരിക്കേറ്റത്. രാമന്തളി വടക്കുമ്പാട് അറവിനായി കൊണ്ടുവന്ന പോത്താണ് വിരണ്ടോടിയതിനെ തുടർന്നാണ് പുരുഷോത്തമന് പരിക്കേറ്റത്. മാട്ടൂലിൽ മറ്റൊരു പോത്ത് ബൈക്കിലിടിച്ചാണ് അദിനാന് പരിക്കേറ്റത്.
ഇന്ന് പുലര്‍ച്ചെ നാലിന് പുഞ്ചക്കാട്ടെ വീട്ടിൽ നിന്ന് ഹോട്ടലിലേക്ക് പോകുന്പോഴാണ് പുരുഷോത്തമന് പരിക്കേറ്റത്. റോഡിലേക്ക് ചാടിയ പോത്തിന്‍റെ ദേഹത്തിടിച്ച് ബൈക്ക് മറിയുകയായിരുന്നു. ഇയാളെ പയ്യന്നൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.അപകടത്തില്‍ ബൈക്ക് തകര്‍ന്നു.
പുന്നക്കടവ് പാലത്തിന് സമീപം പോത്തിനെ കണ്ട ചിലര്‍ ഇതിനെ പിടിക്കാന്‍ ശ്രമിച്ചപ്പോഴാണ് വിരണ്ടൊടിയതെന്നും ഇതിനിടയിലാണ് ബൈക്കിന് മുന്നിലേക്ക് ചാടിയതെന്നുമാണ് അറിയുന്നത്. അപകടത്തില്‍ പരിക്കേറ്റ് അബോധാവസ്ഥയില്‍ റോഡില്‍ കിടന്ന ഹോട്ടലുടമയെ ഒരു മണിക്കൂറിന് ശേഷമാണ് ഇതിലേ വന്നവര്‍ കണ്ടെത്തിയത്.
ഇന്നലെ രാത്രി എട്ടോടെയാണ് മാട്ടൂലിൽ അദിനാന് യാത്ര ചെയ്തിരുന്ന ബൈക്കിന് മുന്നിലേക്ക് പോത്ത് ഓടിയെത്തിയത്. പോത്തിലിടിച്ച് ബൈക്ക് മറിഞ്ഞ് പരിക്കേറ്റ അദിനാനെ പയ്യന്നൂര്‍ സഹകരണ ആശുപത്രിയില്‍ പ്രവേശിപ്പിച്ചു.
