നിത്യാ മേനോനെ കേന്ദ്രകഥാപാത്രമാക്കി വി.കെ. പ്രകാശ് സംവിധാനം ചെയ്യുന്ന പ്രാണയ്ക്ക് ആശംസയുമായി യുവതാരം ദുൽഖർ സൽമാൻ. ഫേസ്ബുക്ക് പേജിലൂടെയാണ് അദ്ദേഹം സിനിമയ്ക്കും അണിയറപ്രവർത്തകർക്കും ഭാവുകങ്ങൾ നേർന്നത്.
രാജേഷ് ജയരാമനാണ് ചിത്രത്തിന്‍റെ തിരക്കഥ തയാറാക്കിയത്. ഓസ്കാർ ജേതാവ് റസൂൽ പൂക്കുട്ടി ആദ്യമായി സിങ്ക് സറൗണ്ട് സൗണ്ട് ഫോർമാറ്റിലൂടെ ശബ്ദലേഖനം നടത്തിയ ചിത്രമെന്ന പ്രത്യേകതയും ഈ സിനിമയ്ക്കുണ്ട്. പി.സി. ശ്രീറാം ചിത്രത്തിനായി കാമറ ചലിപ്പിക്കുന്നു.
ഹിന്ദി, മലയാളം, തെലുങ്ക്, കന്നഡ എന്നീ നാലുഭാഷകളിലായാണ് ഈ ചിത്രം റിലീസ് ചെയ്യുന്നത്. എസ് രാജ് പ്രൊഡക്ഷൻസിന്റെയും റിയൽ സ്റ്റുഡിയോയുടെയും ബാനറിൽ സുരേഷ് രാജ്, പ്രവീണ്‍ കുമാർ, അനിത രാജ് എന്നിവരാണ് ഈ സിനിമ നിർമിക്കുന്നത്.
