പുന്നയൂർക്കുളം: പ്രണയാഭ്യർഥന നിരസിച്ച പെണ്‍കുട്ടിയുടെ വീടിനു നേരെ ആക്രമണം. സംഭവത്തിലെ പ്രതിയെ പോലീസ് അറസ്റ്റുചെയ്തു. വടക്കേക്കാട് വൈലേരിപീടിക കുന്നനയിൽവീട്ടിൽ ഷക്കീറി(28)നെയാണ് ചാവക്കാട് സിഐ കെ.ജി.സുരേഷും വടക്കേക്കാട് എസ്ഐ എ.അനന്തകൃഷ്ണനും സംഘവും അറസ്റ്റുചെയ്തത്.
കഴിഞ്ഞദിവസം യുവാവ് പ്രണയാഭ്യർഥന നിരസിച്ച പെണ്‍കുട്ടിയുടെ വീടിനു നേരെ ആക്രമണം നടത്തുകയായിരുന്നു. വീടിന്‍റെ ജനൽചില്ലുകൾ എറിഞ്ഞുടയ്ക്കുകയും ടാപ്പുകൾ നശിപ്പിക്കുകയും വീട്ടുവളപ്പിലെ വാഴകൾ വെട്ടി നശിപ്പിക്കുകയും ചെയ്തിരുന്നു. രണ്ടുമാസം മുന്പാണ് യുവാവ് പെണ്‍കുട്ടിയെ വിവാഹാഭ്യർഥനയുമായി സമീപിച്ചത്. പെണ്‍കുട്ടി വിവരം വീട്ടുകാരെ അറിയിക്കുകയും പോലീസിൽ പരാതിപ്പെടുകയും ചെയ്തിരുന്നു.
വീണ്ടും രണ്ടുതവണ പെണ്‍കുട്ടിയെ ശല്യപ്പെടുത്താൻ ശ്രമിച്ചതിനെ തുടർന്ന് വീണ്ടും പോലീസിൽ പരാതി നൽകി. പോലീസ് ഷക്കീറിന്‍റെ വീട്ടുകാരെ വിളിച്ചുവരുത്തി താക്കീത് ചെയ്ത് വിടുകയായിരുന്നു. ഇതിനെ തുടർന്നാണ് വീടിനു നേരെ ആക്രമണമുണ്ടായത്. പ്രതിയെ റിമാൻഡ് ചെയ്തു.
