ഹൈദരാബാദ്: പ്രണയത്തില്‍നിന്നു പിന്മാറിയതിന്‍റെ വിരോധത്തില്‍ യുവാവ് പെണ്‍കുട്ടിയുടെ അമ്മയെ കഴുത്തറുത്തു കൊലപ്പെടുത്തി.
ഹൈദരാബാദ് നഗരത്തിലെ മിയാപൂരിലാണു സംഭവം. മിയാപൂര്‍ അയോധ്യാ നഗറിലെ ശോഭ (45) യാണു ദാരുണമായി കൊല്ലപ്പെട്ടത്. അതിരാവിലെ വീട്ടില്‍ അതിക്രമിച്ചു കയറിയായിരുന്നു ആക്രമണം.
ഇവരുടെ 19 വയസുള്ള മകള്‍ വൈഭവിയും സന്ദീപ് എന്നയാളും പ്രണയത്തിലായിരുന്നു. പെണ്‍കുട്ടി പ്രണയത്തില്‍നിന്നു പിന്മാറിയതിന്‍റെ പകയില്‍ ഇന്നലെ രാവിലെ സന്ദീപ് വീട്ടിലെത്തി ആക്രമിക്കുകയായിരുന്നുവെന്നു പോലീസ് പറയുന്നു.
വൈഭവിയെ ആക്രമിക്കുന്നതു തടയാനെത്തിയപ്പോഴാണു ശോഭയ്ക്കു വെട്ടേറ്റത്. അയല്‍വാസികള്‍ ഇരുവരെയും ഉടന്‍ ആശുപത്രിയിലെത്തിച്ചെങ്കിലും ശോഭ മരിച്ചു.
അമ്മയെയും മകളെയും വെട്ടിവീഴ്ത്തിയശേഷം സന്ദീപ് സ്വയം കഴുത്തുമുറിച്ച് ആത്മഹത്യയ്ക്കു ശ്രമിച്ചു. ഇയാളും പെണ്‍കുട്ടിയും അതീവ ഗുരുതരാവസ്ഥയില്‍ ചികിത്സയില്‍ തുടരുകയാണ്.
