ഇരിങ്ങാലക്കുട: സിനിമാ സീരിയൽ നടിയും വീട്ടമ്മയുമായ സ്ത്രീയെ വീട്ടിൽ കയറി വടി കൊണ്ട ് തലയ്ക്കടിക്കുകയും ആസിഡ് മുഖത്ത് സ്പ്രേ ചെയ്ത് പരിക്കേൽപ്പിക്കുകയും ചെയ്ത കേസിൽ യുവാവ് അറസ്റ്റിൽ.
മാന്ദാമംഗലം വല്ലൂർ അരീക്കൽ വീട്ടിൽ ഷിജു (37) വാണ് അറസ്റ്റിലായത്. ആളൂർ എസ്ഐ വി.വി. വിമലിന്‍റെ നേതൃത്വത്തിലുള്ള സംഘമാണ് പ്രതിയെ അറസ്റ്റുചെയ്തത്. കഴിഞ്ഞ ഡിസംബർ ഏഴിനാണ് കേസിനാസ്പദമായ സംഭവം നടന്നത്.
നടിയുടെ വീടിനകത്ത് കയറിയാണ് ’ നിന്നെ ഇനി അഭിനയിക്കാൻ സമ്മതിക്കില്ല ’ എന്ന് പറഞ്ഞ് പ്രതി ആസിഡ് ആക്രമണം നടത്തിയത്. മുഖത്തും ശരിരത്തിലും പെള്ളലേറ്റ സ്ത്രീ ഇരിങ്ങാസ്ത്രീ ജനറൽ ആശുപത്രിയിൽ ചികിത്സയിലായിരുന്നു. സീരിയൽ രംഗത്തെ അഭിനയവുമായി ബന്ധപ്പെട്ട തർക്കമാണ് ആക്രമണത്തിൽ കലാശിച്ചത്. പ്രതിയെ സംഭവസ്ഥലത്ത് കൊണ്ടുപോയി തെളിവെടുപ്പ് നടത്തി.
എഎസ്ഐ സി.കെ സുരേഷ്, സീനിയർ സിവിൽ പോലീസ് ഓഫീസർ കെ.വി ജസ്റ്റീൻ, കെ.എസ്.പ്രദീപ് എന്നിവരാണ് അന്വേഷണ സംഘത്തിലുണ്ടായിരുന്നത്. കോടതിയിൽ ഹാജരാക്കിയ പ്രതിയെ റിമാന്‌ഡു ചെയ്തു.
