പത്തനാപുരം: ക്രിസ്മസ് സന്ദേശം അന്വര്‍ഥമാക്കി പ്രവാസി. പിടവൂര്‍ നെല്ലിമൂട്ടില്‍ ജേക്കബ് ജോര്‍ജാണ് സഹജീവി സ്നേഹത്തിന്‍റെ ഉദാത്ത മാതൃകയായി ക്രിസ്മസ് സന്ദേശം സമൂഹത്തിന് സമ്മാനിക്കുന്നത്.
പിടവൂര്‍ ശാലേം ഓര്‍ത്തഡോക്സ് ദേവാലയത്തിലെ ക്രിസ്മസ് കരോളിന്‍റെ ഭാഗമായി ഇടവകാംഗമായ പുന്നല ചാച്ചിപ്പുന്ന തച്ചക്കോട് പറങ്കാംവിള ഷാജിയുടെ വീട്ടിലെത്തിയ സംഘം കനാല്‍ പുറമ്പോക്കിലെ തകരാറായ കൂരയിലാണ് ഷാജിയെയും കുടുംബത്തെയും കാണുന്നത്.
വീടിന്‍റെ അറ്റകുറ്റപ്പണികള്‍ നടത്തി താമസയോഗ്യമാക്കണമെന്ന തീരുമാനം ഇടവക വികാരി ഫാ. തോമസ് പി മുകളിലും കരോള്‍ സംഘത്തിലുള്ളവരും ആലോചന നടത്തുന്നതിനിടയിലാണ് ജേക്കബ് ജോര്‍ജെന്ന കൊച്ചുമോന്‍ തന്‍റെ വക അഞ്ച് സെന്‍റ് പുരയിടം കുടുംബത്തിന് ദാനമായി നല്‍കാമെന്നേറ്റത്.
കനാല്‍ പുറമ്പോക്കിലെ താമസക്കാരായതിനാല്‍ പട്ടയം പോലും ഇവര്‍ക്ക് ലഭ്യമല്ല. അതിനാല്‍ അറ്റകുറ്റപ്പണികള്‍ക്ക് പോലും തദ്ദേശസ്വയംഭരണസ്ഥാപനങ്ങളില്‍ നിന്നോ മറ്റോ യാതൊരുവിധ സഹായവും ലഭ്യമല്ല. കൂലിവേലക്കാരനായ ഷാജിയ്ക്ക് ജീവിതത്തിന്‍റെ രണ്ടറ്റവും കൂട്ടിമുട്ടിക്കാന്‍ തന്നെ പാടുപെടുമ്പോള്‍ കിടപ്പാടം മെച്ചപ്പെടുത്താനാവാത്ത അവസ്ഥയുമാണ്. പിടവൂര്‍ ദേവാലയത്തിന് സമീപമുള്ള ഗതാഗത സൗകര്യമുള്ള വസ്തുവാണ് ജേക്കബ് ജോര്‍ജ് ഷാജിക്ക് ക്രിസ്മസ് സമ്മാനമായി നല്‍കിയത്.
അറബ്നാടുകളിലും പിന്നീട് യുകെയിലും പ്രവാസജീവിതം നയിച്ച കൊച്ചുമോന്‍ ഇപ്പോള്‍ വയോധികയായ മാതാവിനൊപ്പം നാട്ടിലാണ്. വസ്തു ലഭിച്ചതോടെ ഷാജിയ്ക്ക് ദേവാലയത്തിന്‍റെ നേതൃത്വത്തില്‍ സുമനസുകളുടെ സഹകരണത്തോടെ വീടൊരുങ്ങും.
