സോഷ്യൽ മീഡിയയിൽ സെലിബ്രിറ്റികളുടെ ബാല്യകാല ചിത്രങ്ങൾ വൈറലാകാറുണ്ട്. ഇത്തരത്തിലുള്ള ഒരു യുവനടിയുടെ ചിത്രമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. ചില താരങ്ങളുടെ കുട്ടിക്കാല ചിത്രങ്ങൾ കാണുമ്പോൾ തന്നെ നമുക്ക് ആരാണെന്ന് മനസിലാവുന്നതാണ്. എന്നാൽ ഇപ്പോൾ പ്രചരിക്കുന്ന ചിത്രം കണ്ടാൽ ആരാണെന്ന് മനസിലാക്കാൻ കുറച്ച് പാടുപെടും.
മലയാളത്തിലെ ഒരു ശ്രദ്ധേയയായ യുവനടിയുടെ കുട്ടിക്കാല ചിത്രമാണിത്. അതെ പറഞ്ഞുവരുന്നത് മലയാളികളുടെ സ്വന്തം പ്രയാഗ മാർട്ടിനെ കുറിച്ചാണ്. കൈകൂപ്പി നിൽക്കുന്ന കുട്ടിയെ കണ്ടാൽ ഇത് പ്രയാഗയാണെന്ന് തിരിച്ചറിയാൻ അല്പം ബുദ്ധിമുട്ടും. ഈ ചിത്രം പ്രയാഗയുടെ ഫാന്‍ പേജിലൂടെയാണ് ഇപ്പോള്‍ വൈറലാവുന്നത്.
2009 ല്‍ സാഗർ ഏലിയാസ് ജാക്കി എന്ന ചിത്രത്തിലൂടെ ബാലതാരമായാണ് പ്രയാഗ സിനിമയിലേക്ക് ചുവട് വയ്ക്കുന്നത്. പിന്നീട് ഉസ്താദ് ഹോട്ടൽ എന്ന ചിത്രത്തിൽ ബാലതാരമായും പ്രയാഗ എത്തിയിരുന്നു. എന്നാൽ നായികയായി താരം വെള്ളിത്തിരയിലെത്തുന്നത് തമിഴകത്തു നിന്നാണ്. പിസാസ് എന്ന ആദ്യ ചിത്രം തന്നെ ശ്രദ്ധിക്കപ്പെട്ടിരുന്നു. പിന്നാലെ ഒരു മുറൈ വന്ത് പാര്‍ത്തായ എന്ന ചിത്രത്തിലൂടെ മലയാളത്തില്‍ തുടക്കം. തുടർന്ന് പാവ, കട്ടപ്പനയിലെ ഹൃത്വിക് റോഷന്‍, ഒരേ മുഖം, ഫുക്രി, വിശ്വാസ പൂര്‍വ്വം മന്‍സൂര്‍, പോക്കിരി സൈമണ്‍, രാമലീല, ഒരു പഴയ ബോംബ് കഥ, ബ്രദേഴ്‌സ് ഡേ, ഉള്‍ട്ട തുടങ്ങിയ സിനിമകളിലും താരം അഭിനയിച്ചു.
എന്നാൽ സിനിമയിലൂടെ കണ്ട നാടൻപെൺകുട്ടിയെയല്ല പിന്നീട് പൊതുവേദികളിലും സോഷ്യൽ മീഡിയയിലൂടെയും പ്രേക്ഷകർ കണ്ടത്. വസ്ത്രധാരണത്തിലും ഹെയർ സ്റ്റൈലിലും മാറ്റം വരുത്തിയ പ്രയാഗയുടെ മേക്ക് ഓവർ ആരാധകർക്കിടയിൽ വലിയ ചർച്ചയായിരുന്നു. നടിക്കെതിരെ ഇതുമായി ബന്ധപ്പെട്ട് നിരവധി ട്രോളുകളും ഇറങ്ങിയിരുന്നു. തനിക്ക് ഇഷ്ടമുള്ള വേഷം താൻ ധരിക്കുന്നൂ എന്നാണ് വിമർശനങ്ങളോട് പ്രയാഗ പ്രതികരിച്ചത്.
