ഫീനിക്സ്: ദത്തെടുത്ത വളർത്തിയ കുട്ടിയുടെ മൃതദേഹം രണ്ടു വർഷത്തോളം വീട്ടിൽ സൂക്ഷിച്ച ദന്പതികളെ പോലീസ് അറസ്റ്റു ചെയ്തു. ഇവർ ദത്തെടുത്ത മറ്റു മൂന്നു കുട്ടികളെ ശിശുക്ഷേമ അധികൃതർ ഏറ്റെടുത്തു.
മരണപ്പെട്ട കുട്ടിയുടെ മൃതദേഹം രണ്ടു വർഷത്തിലേറെയായി ഒരു അറയിൽ ഒളിപ്പിച്ചതായി കണ്ടെത്തിയെന്ന് പ്രൊസിക്യൂട്ടർമാർ കോടതിയിൽ പറഞ്ഞു.
കുട്ടികളെ ദേഹോപദ്രവം ചെയ്യൽ, മൃതദേഹം ഉപേക്ഷിക്കുകയോ മറച്ചുവെക്കുകയോ ചെയ്യൽ, വീടിന് തീ വെയ്ക്കൽ എന്നീ വകുപ്പുകൾ ചാർത്തി റാഫേൽ ലോറ (56), മാരിബെൽ ലോറ (50) എന്നിവർക്കെതിരെയാണ് മാരികോപ്പ കൗണ്ടി അറ്റോർണി ഓഫീസ് നേരിട്ട് പരാതി നൽകിയത്.
ഇവർ താമസിക്കുന്ന വീട്ടിൽ നിന്ന് പുക വരുന്നതു കണ്ടതിനെത്തുടർന്നാണ് ജനുവരി 28 ന് അഗ്നിശമന സേനാംഗങ്ങൾ സ്ഥലത്തെത്തിയത്. തുടർന്നാണ് വീട്ടിൽ നിന്ന് ഒരു കുട്ടിയുടെ അസ്ഥികൂട അവശിഷ്ടങ്ങൾ കണ്ടെത്തിയത്.
വീടിന് തീ പിടിക്കുന്നതിന് മണിക്കൂറുകൾക്ക് മുന്പ്, അരിസോണ ഡിപ്പാർട്ട്മെൻറ് ഓഫ് ചൈൽഡ് സേഫ്റ്റിയിലെ അന്വേഷകർ കുട്ടികളെ ദേഹോപദ്രവം ഏല്പിച്ചുവെന്നാരോപിച്ച് 9 വയസുള്ള ആണ്‍കുട്ടിയെയും 4 വയസുകാരിയെയും വീട്ടിൽ നിന്നു നീക്കം ചെയ്തിരുന്നു.
ദത്തെടുത്ത കുട്ടികളായതുകൊണ്ട് ശിശുക്ഷേമ അധികൃതർ ജനുവരി 20 ന് അന്വേഷണം ആരംഭിച്ചിരുന്നു. പതിനൊന്നു വയസുകാരി പെണ്‍കുട്ടി രണ്ട് ദിവസമായി വീട്ടിൽ തനിച്ചാണെന്നും, ഭയമാണെന്നും വിശക്കുന്നുവെന്നും പോലീസിനെ വിളിച്ചു പറഞ്ഞിരുന്നു.
അതനുസരിച്ചാണ് ശിശുക്ഷേമ അധികൃതർ അന്വേഷണത്തിനെത്തിയത്. ആ സമയത്ത് മറ്റു കുട്ടികളൊന്നും വീട്ടിൽ ഉണ്ടായിരുന്നില്ല. പെണ്‍കുട്ടിയെ അവർ വീട്ടിൽ നിന്ന് നീക്കം ചെയ്തതായി തിങ്കളാഴ്ച കൗണ്ടി പ്രൊസിക്യൂട്ടർമാർ പുറത്തുവിട്ട കോടതി രേഖകളിൽ പറയുന്നു.
ദന്പതികളുടെ പരിചരണത്തിലുണ്ടായിരുന്ന മറ്റൊരു 11 വയസുള്ള പെണ്‍കുട്ടിയെക്കുറിച്ച് കഴിഞ്ഞ മാസം ശിശുക്ഷേമ അധികൃതർ റാഫേൽ ലോറയോട് ചോദിച്ചിരുന്നു.
കാരണം 2017 മുതൽ ഈ കുട്ടിയെക്കുറിച്ചുള്ള വിവരങ്ങൾ ദന്പതികൾ മറച്ചുവെച്ചിരുന്നു. എന്നാൽ, കുട്ടി മെക്സിക്കോയിലേക്ക് പോയി എന്നാണ് അന്വേഷകരോട് പറഞ്ഞത്.
കൂടുതൽ ചോദ്യം ചെയ്യലിൽ, 2017 ജൂലൈയിൽ കുട്ടിക്ക് അസുഖം വന്നെങ്കിലും ദിവസങ്ങളോളം ആശുപത്രിയിൽ പ്രവേശിപ്പിച്ചിരുന്നില്ലെന്നും പിന്നീട് കുട്ടി മരിച്ചുവെന്നും, മൃതദേഹം ഒരു പ്ലാസ്റ്റിക് ഷീറ്റിൽ പൊതിഞ്ഞ് വീടിന്‍റെ മച്ചിൽ വെച്ചെന്ന് ലോറ പറഞ്ഞു.
ഫോറൻസിക് പോസ്റ്റ്മോർട്ടത്തിൽ കുട്ടിയെ ദേഹോപദ്രവം ഏല്പിച്ചിരുന്നത് കണ്ടെത്തുമെന്ന ഭയമാണ് മൃതദേഹം അധികൃതരിൽ നിന്ന് ഒളിപ്പിച്ചു വെച്ചതെന്ന് പ്രൊസിക്യൂട്ടർ പറഞ്ഞു.
കുട്ടികളെ ഉപദ്രവിച്ചത് ഭാര്യയാണെന്നും ചൂലു കൊണ്ടും ഇലക്ട്രിക്കൽ വയറുകൾ കൊണ്ടും അടിക്കുമായിരുന്നുവെന്ന് ഭർത്താവ് റാഫേൽ ലോറ പോലീസിനോട് പറഞ്ഞു. ഭാര്യ തന്നെയും ഉപദ്രവിക്കുമെന്ന ഭയമാണ് അതെല്ലാം പോലീസിൽ റിപ്പോർട്ട് ചെയ്യാതിരുന്നതെന്നും ലോറ പറഞ്ഞു.
മാനസിക പിരിമുറുക്കം കൂടിയപ്പോഴാണ് വീടിന്‍റെ മച്ചിൽ സൂക്ഷിച്ചിരുന്ന പതിനൊന്നു വയസ്സുകാരിയുടെ മൃതദേഹം വീടിന്‍റെ പുറകിലെത്തിച്ചതും വാഹനത്തിൽ നിന്നെടുത്ത പെട്രോൾ ഒഴിച്ച് വീടിനടക്കം തീവെച്ചതെന്നും റാഫേൽ ലോറ പറഞ്ഞു.
റിപ്പോർട്ട്: മൊയ്തീൻ പുത്തൻചിറ
