തെലുങ്ക് സൂപ്പർതാരം ജൂനിയർ എൻടിആറിനെ അറിയില്ല എന്ന് പറഞ്ഞതിന്‍റെ പേരിൽ നടി മീര ചോപ്രയ്ക്കെതിരേ സോഷ്യൽ മീഡിയയിൽ അസഭ്യവർഷം.
ട്വിറ്ററിൽ ജൂനിയർ എൻടിആറിനെക്കുറിച്ചു പറയൂ എന്ന ചോദ്യത്തിന് അദ്ദേഹത്തെ തനിക്കറിയില്ലെന്നാണ് മീര ചോപ്ര പറഞ്ഞത്. ഈ മറുപടി നടന്‍റെ ആരാധകരെ പ്രകോപിപ്പിച്ചു.
ട്വിറ്ററിൽ ബലാത്സംഗ ഭീഷണിയും വധഭീഷണിയും വരെ മീര ചോപ്രയ്ക്ക് നേരേ ഉയർന്നു. എന്നാൽ തനിക്കെതിരേ നടന്ന അസഭ്യവർഷത്തിന്‍റെ സ്ക്രീൻഷോട്ട് എടുത്ത് ഹൈദരാബാദ് സൈബർ സെല്ലിന് പരാതി നൽകുകയാണ് മീര ചോപ്ര ചെയ്തത്.
കൂടാതെ ഈ അക്കൗണ്ടുകൾ സസ്പെൻഡ് ചെയ്യണമെന്ന് ട്വിറ്ററിനോട് ആവശ്യപ്പെടുകയും ചെയ്തു. താങ്കളേക്കാൾ മഹേഷ് ബാബുവിനെ ഇഷ്ടപ്പെടുന്നു എന്ന് പറഞ്ഞതിന്‍റെ പേരിലാണ് ഈ രീതിയിലുള്ള ആക്രമണം നേരിടേണ്ടി വന്നതെന്നും, ഇത്തരം ആരാധകരുള്ളതിൽ താങ്കൾ അഭിമാനിക്കുന്നുണ്ടോയെന്നും മീര ചോപ്ര മറ്റൊരു ട്വീറ്റിൽ ജൂനിയർ എൻടിആറിനെ ടാഗ് ചെയ്തുകൊണ്ടു ചോദിച്ചു.
ജൂനിയർ എൻടിആറിന്‍റെ പേര് കളയുകയാണ് ഈ ആരാധകർ ചെയ്യുന്നതെന്നും മീര പറയുന്നു. ഈ വിഷയത്തിൽ ഇതുവരെ ജൂനിയർ എൻടിആറിന്‍റെ പ്രതികരണം വന്നിട്ടില്ല.
