ചെന്നൈ: പ്രൈം വോളിബോൾ സീസണ്‍ മൂന്ന് ഫൈനലിൽ കാലിക്കട്ട് ഹീറോസും ഡൽഹി തൂഫാൻസും ഏറ്റുമുട്ടും. സൂപ്പർ ഫൈവ് പോയിന്റ് ടേബിളിൽ ഒന്നാം സ്ഥാനക്കാരായാണ് കാലിക്കട്ട് ഹീറോസ് ഫൈനലിൽ പ്രവേശിച്ചത്.
ഇന്നലെ നടന്ന എലിമിനേറ്ററിൽ നിലവിലെ ചാന്പ്യന്മാരായ അഹമ്മദാബാദ് ഡിഫെൻഡേഴ്സിനെ കീഴടക്കിയാണ് പ്രൈം വോളിബോളിലെ കന്നിക്കാരായ ഡൽഹി തൂഫാൻസ് ഫൈനലിലേക്ക് മാർച്ച് ചെയ്തത്. അഞ്ച് സെറ്റ് നീണ്ട പോരാട്ടത്തിൽ 15-9, 10-15, 10-15, 15-12, 17-15നായിരുന്നു ഡൽഹിയുടെ ജയം.
നാളെയാണ് ഡൽഹി x കാലിക്കട്ട് ഫൈനൽ. വൈകുന്നേരം 6.30നാണ് കലാശപ്പോരാട്ടം തുടങ്ങുക. ലീഗ് റൗണ്ട് പോയിന്റ് ടേബിളിലും കാലിക്കട്ടായിരുന്നു ഒന്നാം സ്ഥാനക്കാർ.
സൂപ്പർ ഫൈവിൽ നാല് മത്സരങ്ങളിൽ ആറ് പോയിന്റ് നേടിയാണ് കാലിക്കട്ട് ഫൈനലിലേക്ക് നേരിട്ട് മുന്നേറിയത്. സൂപ്പർ ഫൈവിലെ രണ്ടും മൂന്നും സ്ഥാനക്കാരായിരുന്നു ഡൽഹി തൂഫാൻസും (അഞ്ച് പോയിന്റ്) അഹമ്മദാബാദ് ഡിഫെൻഡേഴ്സും (നാല് പോയിന്റ്).
