ഞാന്‍ ദൈവത്തില്‍ വിശ്വസിക്കുന്നു, കാരണം ഞാന്‍ ദൈവത്തെ കണ്ടിട്ടുണ്ട്…. പലവട്ടം. ക്രിക്കറ്റ് ഇതിഹാസം സച്ചിന്‍ തെണ്ടുല്‍ക്കറിനൊപ്പം നില്‍ക്കുന്ന ഫോട്ടോയ്ക്കു പൃഥ്വിരാജ് ഇട്ട ക്യാപ്ഷനായിരുന്നു ഇത്. സച്ചിനൊപ്പമുള്ള സെല്‍ഫിയാണ് പൃഥ്വി ഫേസ്ബുക്കില്‍ പോസ്റ്റ് ചെയ്തിരിക്കുന്നത്. ഇരു താരങ്ങളുടെയും ആരാധകര്‍ അഭിനന്ദനങ്ങളുമായി കമന്റുകള്‍ തുടരുന്നു. രണ്ടു മണിക്കൂര്‍ കൊണ്ട് ഒരു ലക്ഷത്തോളം പേര്‍ ഫോട്ടോ കണ്ടു. നാലായിരത്തോളം പേര്‍ ഷെയര്‍ ചെയ്യുകയും ചെയ്തു.
ക്രിക്കറ്റും സിനിമാ ലോകവും തമ്മില്‍ ഒരു ആത്മബന്ധമുണ്ട്. ഇന്ന് നടക്കുന്ന ഐസിസി ചാമ്പ്യന്‍സ് ട്രോഫിയില്‍ ഇന്ത്യ- പാക് മത്സരം കാണാന്‍ നിരവധി താരങ്ങളാണ് ഇംഗ്ലണ്ടിലേക്ക് പോയിരിക്കുന്നത്. അക്കൂട്ടത്തില്‍ കേരളത്തില്‍ നിന്നും പൃഥിരാജും പോയി. ഇതിനിടെയാണ് പൃഥ്വി സച്ചിനൊപ്പം നില്‍ക്കുന്ന സെല്‍ഫി പോസ്റ്റ് ചെയ്തിരിക്കുന്നത്. താന്‍ കളി കാണുന്നതിനായി ഇംഗ്ലണ്ടിലെത്തിയ വിവരം ഫേസ്ബുക്കിലുടെ തന്നെയാണ് താരം വെളിപ്പെടുത്തിയത്. ഇഗ്ലണ്ടിലെത്തിയതുമുതല്‍ അവിടെ നിന്നുള്ള വ്യത്യസ്ത ഫോട്ടോകള്‍ പൃഥിരാജ് ഫേസ്ബുക്കില്‍ പോസ്റ്റ് ചെയ്തിരുന്നു. കളിക്കാനായി കോലി ക്രീസില്‍ നില്‍ക്കുന്നതടക്കമുള്ള ചിത്രങ്ങള്‍ പൃഥിരാജ് പോസ്റ്റ് ചെയ്തിരുന്നു. ഏതായാലും രണ്ടുതാരങ്ങളുടെയും കണ്ടുമുട്ടല്‍ ആഘോഷമാക്കുകയാണ് ഇരുവരുടെയും ആരാധകരായ മലയാളികള്‍.
