മലയാളികള്‍ ഏറെ ആവേശത്തോടെ കാത്തിരിക്കുന്ന, മോഹന്‍ലാല്‍ ചിത്രം ലൂസിഫര്‍ അച്ഛന് സുകുമാരന് സമര്‍പ്പിച്ച് ചിത്രത്തിന്റെ സംവിധായകന്‍ പൃഥിരാജ്. ചിത്രം റിലീസ് ചെയ്യുന്ന ദിവസമാണ് ഫേസ്ബുക്കിലൂടെ പൃഥിരാജ് ഇക്കാര്യം വ്യക്തമാക്കിയിരിക്കുന്നത്.
‘ഇത് അച്ഛനുള്ളതാണ്, എനിക്കറിയാം അച്ഛനിത് കാണുന്നുണ്ടെന്ന്…!’ ലൂസിഫറിന്റെ പോസ്റ്റര്‍ പങ്കുവച്ചു കൊണ്ട് പൃഥ്വിരാജ് കുറിച്ചു.
മുരളി ഗോപിയുടെ തിരക്കഥയില്‍ ഒരുങ്ങുന്ന ചിത്രത്തില്‍ സ്റ്റീഫന്‍ നെടുമ്പള്ളി എന്ന കഥാപാത്രമായാണ് മോഹന്‍ലാല്‍ എത്തുന്നത്. ഒരു പൊളിറ്റിക്കല്‍ ത്രില്ലര്‍ ആണ് ലൂസിഫറെന്ന് ട്രെയ്ലറില്‍ സൂചനകള്‍ ഉണ്ടെങ്കിലും ചിത്രത്തിന്റെ പശ്ചാത്തലം മാത്രമേ രാഷ്ട്രീയം ഉള്ളൂ എന്ന് സംവിധായകന്‍ നേരത്തെ വ്യക്തമാക്കിയിരുന്നു. മഞ്ജു വാര്യര്‍ നായികയായെത്തുന്ന ചിത്രത്തില്‍ ബോളിവുഡ് താരം വിവേക് ഒബ്‌റോയ്, ടൊവിനോ, ഇന്ദ്രജിത്, ഫാസില്‍ എന്നിവരും വേഷമിടുന്നു.
ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മിക്കുന്നത്. ഛായാഗ്രാഹണം സുജിത് വാസുദേവ് .ലൂസിഫറിന്റെ അലയൊലികളാണ് മലയാള സിനിമാലോകത്ത് എങ്ങും മുഴങ്ങി കേള്‍ക്കുന്നത്.
