ഒമർ ലുലു ചിത്രമായ ഒരു അഡാർ ലൗവിലൂടെ വെള്ളിത്തരയിൽ അരങ്ങേറ്റം കുറിച്ച പ്രിയ, ചിത്രം പുറത്തിറങ്ങും മുമ്പുതന്നെ പ്രേക്ഷകരുടെ പ്രിയങ്കരിയാവുകയായിരുന്നു.
മലയാളത്തിൽ മാത്രമല്ല ഇന്ത്യൻ സിനിമയിലും താരത്തിന് കൈനിറയെ ആരാധകരാണ്. അഭിനേത്രി മാത്രമല്ല മികച്ച ഗായിക കൂടിയാണെന്ന് പ്രിയ ഇതിനോടകം തന്നെ തെളിയിച്ചിട്ടുണ്ട്.
രജിഷ വിജയൻ സുരാജ് വെഞ്ഞാറംമൂട് എന്നിവർ പ്രധാന വേഷത്തിൽ എത്തിയ ഫൈനൽസ് എന്ന ചിത്രത്തിൽ മനോഹരമായ ഒരു ഗാനം ആലപിച്ചു കൊണ്ടായിരുന്നു പിന്നണി ഗാനമേഖലയിൽ ചുവട് വെച്ചത്.
മികച്ച അഭിപ്രായമായിരുന്നു പാട്ടിന് ലഭിച്ചിരുന്നത്. ഇപ്പോഴിതാ വീണ്ടും അതിമനോഹരമായ ഗാനവുമായി പ്രിയ പ്രേക്ഷകരുടെ മുന്നിൽ എത്തിയിരിക്കുകയാണ്.
അങ്ങാടി തെരുവ് എന്ന ചിത്രത്തിലെ ഉൻ പേര്… എന്ന് തുടങ്ങുന്ന ഗാനമാണ് താരം ആലപിച്ചിരിക്കുന്നത്. ക്വാറന്‍റൈൻ സിംഗിംഗ് ഡയറീസ് എന്ന അടിക്കുറിപ്പോടെയാണ് പാട്ട് പാടുന്ന വീഡിയോ പങ്കുവച്ചിരിക്കുന്നത്. മികച്ച പ്രതികരണമാണ് പ്രിയയുടെ പാട്ടിന് ലഭിക്കുന്നത്.
ഇതിനു മുൻപും ഒരു ഹിന്ദി പാട്ടുമായി പ്രിയ ഇൻസ്റ്റഗ്രാമിൽ എത്തിയിരുന്നു. സംഗീത സംവിധായകൻ കൈലാസ് മേനോൻ താരത്തിനെ അഭിനന്ദിച്ച് രംഗത്തെത്തിയിരുന്നു.
കിടുവേ.. എന്നായിരുന്നു കമന്‍റ് ചെയ്തത്. ഫൈനൽസിൽ കൈലാസ് മേനോന്റെ സംഗീത സംവിധാനത്തിലാണ് താരം ആദ്യമായി പാടിയത്.
ഒരു ഇടവേളയ്ക്ക് ശേഷം വീണ്ടും സിനിമയിൽ സജീവമാകുകയാണ് പ്രിയ. കന്നഡ ചിത്രത്തിലൂടെയാണ് താരം ഇനി എത്തുന്നത്.വിഷ്ണു പ്രിയ എന്ന് പേരിട്ടിരിക്കുന്ന സിനിമ മലയാളി സംവിധായകൻ വി.കെ. പ്രകാശാണ് ഒരുക്കുന്നത്.
സാൻഡൽവുഡിലെ യുവതാരം ശ്രേയസ് കെ മഞ്ജു ചിത്രത്തിൽ നായകനാവുന്നു. സിനിമയിടെ ഷൂട്ടിംഗ് പുരോഗമിച്ചു കൊണ്ടിരിക്കുകയാണ്. ഒരു റൊമാന്റിക്ക് ചിത്രമായിരിക്കും വിഷ്ണു പ്രിയ എന്നാണ് സൂചന.
ഒരു യഥാർത്ഥ സംഭവകഥയെ ആസ്പദമാക്കികൊണ്ടാണ് ചിത്രം ഒരുങ്ങുന്നതത്രെ. ശ്രേയസ് കെ മഞ്ജുവിന്‍റെ പിതാവ് കെ മഞ്ജുവാണ് ചിത്രം നിർമ്മിക്കുന്നത്. പ്രിയ വാര്യരുടെ ബോളിവുഡ് ചിത്രം ശ്രീദേവി ബംഗ്ലാവ് പ്രദർശനത്തിനായി തയാറെടുക്കുകയാണ്.
