കടുത്തുരുത്തി: തിരിഞ്ഞു നോക്കാനാളില്ലാതെ പൊതുകിണറുകൾ നശിക്കുന്നു. വേനൽമഴയെത്തിയതോടെ വെള്ളക്ഷാമത്തിന് അൽപം ശമനമായെങ്കിലും നാട്ടിൻപുറങ്ങളിലെ ശുദ്ധജലക്ഷാമത്തിന് പരിഹാരം കാണാൻ പറ്റിയ ഏറ്റവും സഹായകമാണ് വേനൽകാലത്തും നിറയെ വെള്ളമുള്ള പൊതുകിണറുകൾ. എക്കാലത്തും നിറയെ ശുദ്ധജലം കിട്ടുന്ന പൊതുകിണറുകളാണ് അധികൃതരുടെ അവഗണന കൊണ്ട് നശിക്കുന്നത്.
കടുത്തുരുത്തി, മാഞ്ഞൂർ, കല്ലറ, ഞീഴൂർ പഞ്ചായത്തുകളിൽ ശുദ്ധജലക്ഷാമം രൂക്ഷമായ മേഖലകളിലെല്ലാം പല വാർഡുകളിലും ഒന്നിലേറെ പൊതുകിണറുകളുണ്ട്. പഞ്ചായത്ത് അധികൃതർ കുടിവെള്ള പദ്ധതികൾക്ക് ലക്ഷങ്ങൾ അനുവദിക്കുന്പോൾ നിലവിൽ സമൃദ്ധമായി നാടിന് കുടിനീര് നൽകാൻ കഴിയുന്ന പൊതുകിണറുകളെ അവഗണിക്കുകയാണ്. നിർമിച്ച് രണ്ട് വർഷം കഴിയും മുൻപുതന്നെ മിക്ക കുടിവെള്ള പദ്ധതികളും താളം തെറ്റും.
മോട്ടോറുകളുടെ തകരാറും, താങ്ങാനാവാത്ത വൈദ്യുതി കുടിശിഖയും, ജലവിതരണ പൈപ്പുകൾ പൊട്ടിയും, പദ്ധതി കിണറുകളിൽ വേനൽ കാലങ്ങളിൽ വെള്ളം വറ്റിയും തുടങ്ങി പലവിധ കാരണങ്ങളാൽ പുതിയ പദ്ധതികൾ നിലയ്ക്കും. പിന്നീട് ലക്ഷങ്ങൾ വീണ്ടും ചെലവഴിച്ചാണ് പദ്ധതികൾ അറ്റകുറ്റപണികൾ നടത്തുന്നത്.
എന്നാൽ, ചില കുടിവെള്ള പദ്ധതികൾ തീരേ അറ്റകുറ്റപണികൾ നടത്താതെ നശിപ്പിക്കുന്നുമുണ്ട്. പ്രദേശത്തെ ഓരോ പഞ്ചായത്തുകളിലും ഇരുപതോളം പൊതുകിണറുകളുണ്ട്. ഇവയിൽ ഭൂരിഭാഗവും അധികൃതർ തിരിഞ്ഞുനോക്കാതെ നശിപ്പിക്കുകയാണ്.മാലിന്യം തള്ളിയും, കാടുമൂടിയും പൊട്ടി പൊളിഞ്ഞു കിണറുകൾ നശിക്കുകയാണിപ്പോൾ.
പതിറ്റാണ്ടുകൾക്ക് മുന്പ് ദീർഘവീക്ഷണത്തോടെ വേനൽകാലങ്ങളിൽപോലും സമൃദ്ധമായി ശുദ്ധജലം കിട്ടുന്ന തരത്തിൽ നിർമിച്ച കിണറുകൾ ഉപയോഗപ്പെടുത്തുന്ന തരത്തിൽ പഞ്ചായത്ത് അധികൃതർ പുതിയ കുടിവെള്ള പദ്ധതികൾ പോലും ആസൂത്രണം ചെയ്തു നടപ്പാക്കുന്നില്ല. ലക്ഷങ്ങൾ മുടക്കി നിർമിക്കുന്ന പദ്ധതികൾ രണ്ട് വർഷം പോലും കാര്യക്ഷമമായി പ്രവർത്തിക്കുന്നില്ല.
എന്നാൽ ആയിരങ്ങൾ മാത്രം മുടക്കിയാൽ നാട്ടിൻപുറങ്ങളിലെ പാതയോരങ്ങളിലുള്ള പൊതുകിണറുകളെ പഴയ പ്രതാപത്തിലേക്ക് തിരിച്ചെത്തിക്കാനും നാട്ടുകാർക്ക് ശുദ്ധജലം നൽകാനുമാവും. അതിന് അധികൃതർ തയാറായാലേ മാലിന്യം കൊണ്ടും കാട് മൂടിയും വീർപ്പുമുട്ടുന്ന പൊതുകിണറുകൾക്ക് ശാപമോക്ഷമാവൂ.
