അമരവിള: അമരവിള എക്സൈസ് സംഘം ഇന്നുപുലർച്ചെ ഉദിയൻകുളങ്ങരയിൽ നടത്തിയ വാഹനപരിശോധനയിൽ ഒരു ടണ്‍ പുകയില ഉത്പന്നങ്ങൾ പിടികൂടി. വാഹനത്തിലുണ്ടായിരുന്ന തിരുനെൽവേലി ആലംകുളം കാമരാജൻ നഗറിൽ രവിചന്ദ്രൻ (28), മാരിയപ്പൻ (32) എന്നിവരെ എക്സൈസ് സംഘം കസ്റ്റഡിയിലെടുത്തു.
മിനിലോറിയുടെ പ്ലാറ്റ്ഫോമിൽ 15 ചാക്കുകളിലും 15 കാർഡ്ബോർഡ് ബോക്സുകളിലും അടുക്കിയ നിലയിലായിരുന്നു പുകയില ഉൽപന്നങ്ങൾ കടത്തിയിരുന്നത്. പുലർച്ചെ നാലോടെ എക്സൈസ് സംഘം കൈകാണിച്ചിട്ടും നിർത്താതെ പോയ വാഹനത്തെ പിന്തുടർന്ന് പിടികൂടുകയായിരുന്നു.
മാർക്കറ്റിൽ 18 ലക്ഷത്തോളം രൂപ വിലവരുന്ന പുകയില ഉൽപന്നങ്ങളാണ് പിടികൂടിയതെന്ന് എക്സൈസ് സംഘം അറിയിച്ചു.എക്സൈസ് ഇൻസ്പെക്ടർ സുരേഷ്കുമാറിന്‍റെ നേതൃത്വത്തിലായിരുന്നു പുകയില ഉത്പ്പന്ന ങ്ങൾ പിടികൂടിയത്. പ്രതികളെയും വാഹനവും ഇന്ന് പാറശാല പോലീസിന് കൈമാറും.
