മാവേലിക്കര: കണ്‍മുന്നിൽ അച്ചനമ്മമാർ തലയ്ക്കടിയേറ്റ് കൊല്ലപ്പെട്ടതിന്റെ നൊന്പരത്തിൽ നിന്നും കുഞ്ഞുദേവൻ ഇന്നും മുക്തനായിട്ടില്ല. 2018 ഏപ്രിൽ 28ന് ബിജുവും ശശികലയും കൊല്ലപ്പെടുന്നതിനു ദൃക്സാക്ഷിയാകേണ്ടി വന്ന മകൻ ഏഴുവയസുകാരൻ ദേവന്‍റെ കണ്ണുകളിൽ നിന്നും ഇന്നും ഭയമൊഴിഞ്ഞിട്ടില്ല. പ്രതി സുധീഷ് അച്ഛനെയും അമ്മയെയും കല്ലും പാരയും കൊണ്ട് തലയ്ക്കടിക്കുന്നതു കണ്ട് ഭയന്നോടിയ ദേവന് അന്ന് ആറുവയസ്.
അതിന്‍റെ ഞെട്ടലിൽ നിന്നും അവൻ കുറച്ചെങ്കിലും മോചിതനാകാൻ ദിവസങ്ങളെടുത്തുവെന്ന് ദേവൻ പഠിക്കുന്ന മുള്ളിക്കുളങ്ങര ഗവ. എൽപി സ്കൂളിലെ അധ്യാപകർ പറയുന്നു. അച്ഛന്‍റെയും അമ്മയുടെയും മരണം ഉൾക്കൊള്ളാനാവാതെ ദിവസങ്ങളോളം സ്കൂളിൽ മൗനത്തിലായിരുന്ന കുഞ്ഞ് ജീവിതത്തിലേക്കു തിരികെ നടന്നത് സ്കൂളിലെ അധ്യാപകരുടെ കൈ പിടിച്ചാണ്.
സംഭവത്തിനു ശേഷം കുടുംബം എന്ന വിഷയത്തെ ആസ്പദമാക്കിയുള്ള പാഠങ്ങൾ ദേവനെ അസ്വസ്ഥനമാക്കിയിരുന്നതായി അധ്യാപകർ പറയുന്നു. ഇതിനായി കൗണ്‍സിലിംഗും നൽകിയിരുന്നതായും അധ്യാപകർ പറയുന്നു. അച്ഛന്‍റെ മോഹം പോലെ പോലീസാകണമെന്നാണ് കുഞ്ഞുദേവന്‍റെയും ആഗ്രഹം, അതിനായി അവൻ നന്നായി പഠിക്കുന്നു. സ്കൂളിലെ അധ്യാപകരുടെയും വിദ്യാർഥികളുടെയും പ്രിയപ്പെട്ടവനാണ് ദേവൻ.
സഹോദരി ദേവു, ആലപ്പുഴ മോഡൽ റസിഡൻഷ്യൽ സ്കൂളിൽ ഏഴാം ക്ലാസ് വിദ്യാർഥിനിയാണ്. അച്ഛനമ്മമാരുടെ ഘാതകന് വധശിക്ഷ ലഭിച്ചുവെന്ന് അറിഞ്ഞിട്ടും നിസംഗതയെടെയുള്ള അവന്‍റെ നില്പ് ചുറ്റുമുള്ളവരെ പോലും കണ്ണീരിലാഴ്ത്തുന്നതായിരുന്നു.
ബിജുവിന്‍റെ സഹോദരൻ രാജന്‍റെ സംരക്ഷണയിലാണ് ദേവൻ കഴിയുന്നത്. ദിനവും തന്നെ വിളിക്കാനെത്തുമായിരുന്ന അച്ഛന്‍റെ സ്കൂട്ടറിന്‍റെ ഇരന്പൽ കാതോർത്ത് എന്നപോലെ സ്കൂൾ വരാന്തയിലുള്ള ദേവന്‍റെ നിൽപ്പിന് ഇന്നും വിരാമമായിട്ടില്ല.
പല്ലാരിമംഗലം സാക്ഷിയായത് സമാനമായ രണ്ട് ഇരട്ടക്കൊലകൾക്ക്
മാവേലിക്കര : പല്ലാരിമംഗലം എന്ന കൊച്ചു ഗ്രാമം സാക്ഷിയായത് സമാനമായ രണ്ട് ഇരട്ടക്കൊലപാതകങ്ങൾക്കാണ്. ഇവിടെ നടന്ന രണ്ട് ഇരട്ടക്കൊലപാതകങ്ങൾക്കും നിരവധി സാമ്യതയുമുണ്ട്. അന്നും കുരുന്നുകൾ സാക്ഷീസ്ഥാനത്ത് എത്തിയിരുന്നു എന്നതും വീടുകൾക്ക് മുന്പിൽവെച്ചായിരുന്നു എന്നതും സമാനതകളാണ്. ആദ്യത്തെ കൊലപാതകം നടക്കുന്നത് 2003ലാണ്. അയൽത്തർക്കത്തെ തുടർന്ന് പല്ലാരിമംഗലം തുണ്ടയ്യത്ത് വീട്ടിൽ സുരേഷ് ബാബുവും ഭാര്യ കമലാസിനിയുമാണ് കൊല്ലപ്പെട്ടത്.
ഇവരുടെ വീടിനു മുന്നിൽ വച്ചു നടന്ന കൊലപാതകത്തിനു സാക്ഷികളാവേണ്ടി വന്നത് ഇവരുടെ പറക്കമുറ്റാത്ത രണ്ടു കുഞ്ഞുങ്ങളായിരുന്നു. അയൽവാസിയും ബന്ധുവുമായ രാജൻ ആയിരുന്നു പ്രതി. ജീവപര്യന്തം തടവിനു ശിക്ഷിക്കപ്പെട്ട ഇയാൾ ഇപ്പോഴും ജയിലിലാണ്. 2018 ഏപ്രിൽ 23നു വീടിന് മുന്നിൽവച്ച് ബിജുവിനെയും ശശികലയെയും തലക്കടിച്ചു കൊല്ലുന്നതിനു സാക്ഷിയായത് ഇവരുടെ ആറുവയസുകാരൻ മകൻ ദേവനായിരുന്നു.
