കാട്ടാക്കട: തൊഴിലുറപ്പ് തൊഴിലാളിയുടെ കഴുത്തിൽ പെരുമ്പാമ്പ് ചുറ്റി. ഒടുവിൽ ഏറെ പണിപ്പെട്ടാണ് പെരുമ്പാമ്പിനെ വേർപ്പെടുത്തിയത്. കള്ളിക്കാട് ഗ്രാമ പഞ്ചായത്തിലെ പെരുംകുളങ്ങര സ്വദേശി ഭുവനചന്ദ്രന്‍റെ കഴുത്തിലാണ് പെരുമ്പാമ്പ് ചുറ്റിയത്.
നെയ്യാർഡാമിനോട് ചേർന്നു കിടക്കുന്ന കിക്മ കോളജ് പരിസരത്ത് തൊഴിലുറപ്പ് തൊഴിലാളികൾ കാട് വൃത്തിയാക്കുന്ന പണി നടത്തുകയായിരുന്നു. ഇവിടത്തെ വള്ളിപ്പടർപ്പിൽ ഉണ്ടായിരുന്ന പാന്പാണ് ഭുവനചന്ദ്രന്‍റെ കഴുത്തിൽ ചുറ്റിയത്.
തൊഴിലാളികളും കോളജ് ഉദ്യോഗസ്ഥരും എത്തി പാമ്പിനെ വേർപ്പെടുത്താൻ ശ്രമിച്ചെങ്കിലും പാമ്പ് വരിഞ്ഞുമുറുക്കി. ഏറെനേരത്തെ ശ്രമത്തിനൊടുവിലാണ് പാന്പിനെ വേർപെടുത്തിയത്.
ദേഹാസ്വാസ്ഥ്യം അനുഭവപ്പെട്ട ഭുവനചന്ദ്രനെ ആശുപത്രിയിൽ എത്തിച്ച് പ്രഥമശുശ്രൂഷ നൽകിവിട്ടയച്ചു. ചാക്കിലാക്കിയ പെരുമ്പാമ്പിനെ നെയ്യാർ വന്യജീവി സങ്കേതത്തിൽ എത്തിക്കുകയും കാട്ടിലേക്ക് തുറന്നു വിടുകയും ചെയ്തു.
