ചേർത്തല: മാരകായുധങ്ങളുമായി എഴംഗ ഗുണ്ടാ സംഘത്തെ ചേർത്തല പോലീസ് പിടികൂടി. പട്ടണക്കാട് രാഹുൽ നിവാസിൽ രാഹുൽ(24), വയലാർ സ്വദേശികളായ മേക്കര വീട്ടിൽ വിഷ്ണു(23), പൂവത്തിങ്കൽ അനന്തു(22), ഇടവത്ത് ജയ്മോൻ(18), തെക്കേ കണിശേരി വീട്ടിൽ അതുൽകൃഷ്ണ(18), തായിക്കാടൻ പള്ളി വീട്ടിൽ ശ്രീരാജ്(18), കുളവൻ ചിറ വീട്ടിൽ രാഹുൽ(19) എന്നിവരെയാണ് ചേർത്തല ഡിവൈഎസ്പി എ.ജി ലാലിന്‍റെ നേതൃത്വത്തിലുള്ള പോലീസ് സംഘം പിടികൂടിയത്.
ശക്തിശ്വരം കവലയ്ക്കു തെക്ക് റെയിൽവേ സ്റ്റേഷൻ റോഡിൽനിന്ന് ഇന്നലെ രാത്രി ഒന്പതോടെയാണ് ഇവരെ അറസ്റ്റ് ചെയ്തത്. മാരകായുധങ്ങളുമായി അക്രമി സംഘം ഓട്ടോയിൽ സഞ്ചരിക്കുന്നതായി പോലീസിനു ലഭിച്ച സന്ദേശത്തെ തുടർന്ന് നടത്തിയ തെരച്ചിലിലാണ് സംഘം വലയിലായത്.
നഗരത്തിലെ ഒരു ഡ്രൈവറെ ആക്രമിക്കുന്നതിനായി ക്വട്ടേഷൻ എടുത്തെത്തിയവരാണ് പ്രതികളെന്നും ഇവരെ വിശദമായി ചോദ്യം ചെയ്തുവരുകയാണെന്നും ചേർത്തല സിഐയുടെ ചാർജുള്ള കുത്തിയതോട് സി.ഐ കെ.സജീവ്, ചേർത്തല എസ്ഐ ജി.അജിത്ത്കുമാർ എന്നിവർ പറഞ്ഞു. പ്രതികളെ ഇന്ന് കോടതിയിൽ ഹാജരാക്കും.
