ഗോഹട്ടി: ആസാമിലെ ബാർപേട്ട ജില്ലയിലെ എഫ്ആർആർഒ എസ്പി കുമാർ സഞ്ജിത് കൃഷ്ണ അറസ്റ്റിൽ. സബ് ഇൻസ്പെക്ടർ തസ്തികയിലേക്കുള്ള പരീക്ഷ പേപ്പർ ചോർന്ന കേസുമായി ബന്ധപ്പെട്ടാണ് ഇയാളെ ആസാം സിഐഡി അറസ്റ്റ് ചെയ്തത്.
ആസാം ചീഫ് സെക്രട്ടറി കുമാർ സഞ്ജയ് കൃഷ്ണയുടെ സഹോദരനാണ് അറസ്റ്റിലായ എസ്പി. എസ്ഐ തസ്തികയിലേക്ക് 2020 സെപ്റ്റംബർ 20ന് നടക്കേണ്ടിയിരുന്ന പരീക്ഷയുടെ ചോദ്യപേപ്പർ വാട്സ്ആപ്പിലൂടെ ചോർന്ന സംഭവത്തിലാണ് നടപടി.
ചോദ്യപേപ്പർ ചോർന്നതിന് പിന്നാലെ പരീക്ഷ റദ്ദാക്കിയിരുന്നു. കേസുമായി ബന്ധപ്പെട്ട് മുൻ ഡിഐജി പ്രശാന്ത കുമാർ ദത്ത, മുൻ ബിജെപി നേതാവ് ദിബാൻ ദേക എന്നിവരുൾപ്പെടെ 50ലധികം പേരെ ആസം പോലീസ് അറസ്റ്റ് ചെയ്തിട്ടുണ്ട്.
