കാലടി: ചൊവ്വര കൊണ്ടോട്ടിയില്‍ മുന്‍ പഞ്ചായത്തംഗത്തെ ആക്രമിച്ച കേസില്‍ അഞ്ച് പേര്‍ അറസ്റ്റില്‍. മലപ്പുറം വേങ്ങര ഫൈസല്‍ ബാബു (38), ഷാജി (37), ഷമീര്‍ (31), മുബാറക് (40), സിറാജ് എന്നിവരെയാണ് റൂറല്‍ ജില്ല പോലീസ് മേധാവി വൈഭവ് സക്‌സേനയുടെ നേതൃത്വത്തിൽ അറസ്റ്റ് ചെയ്തത്. ഇന്നലെ കസ്റ്റഡിയിലെടുത്ത ഇവരുടെ അറസ്റ്റ് രേഖപ്പെടുത്തി.
ചൊവ്വാഴ്ച രാത്രി 10 ഓടെ കാറിലെത്തിയ സംഘമാണ് മുന്‍ പഞ്ചായത്തംഗം സുലൈമാനെയും (50) കൂടെയുണ്ടായിരുന്ന സിദ്ദിഖ് (65), അബ്ദുല്‍ റസാഖ് (38), മന്‍സൂര്‍ അലി (37) എന്നിവരെ ആക്രമിച്ചത്.
സുലൈമാനെ ചുറ്റികകൊണ്ട് ഇടിച്ചും വെട്ടിയും പരിക്കേല്‍പ്പിക്കുകയായിരുന്നു. ഗുരുതരമായി പരിക്കേറ്റ ഇദ്ദേഹത്തെ രാജഗിരി ആശുപത്രിയിലും മറ്റുള്ളവരെ കാരോത്തുകുഴി ആശുപത്രിയിലും പ്രവേശിപ്പിച്ചു. തലയ്ക്കും തോളിനും പരിക്കേറ്റ സിദ്ദിഖും അബ്ദുല്‍ റസാഖും മന്‍സൂര്‍ അലിയും ചികിത്സയ്ക്ക് ശേഷം ആശുപത്രി വിട്ടു.
ശ്രീമൂലനഗരം പഞ്ചായത്തിലെ ഒരു സ്ഥാപനത്തിലെ വാഹന പാര്‍ക്കിംഗുമായി ബന്ധപ്പെട്ട് ഒരു മാസം മുന്പ് ഇവിടെ തര്‍ക്കമുണ്ടായിരുന്നു. ഈ പ്രശ്‌നം പറഞ്ഞു തീര്‍ത്തിരുന്നു. ഇതിന്‍റെ തുടര്‍ച്ചയാണ് ഈ ആക്രമണമെന്ന് കരുതുന്നതായി പോലീസ് പറഞ്ഞു.സംഭവത്തില്‍ പ്രതിഷേധിച്ച് നാട്ടുകാരുടെ നേതൃത്വത്തില്‍ ഇവിടെ പ്രകടനവും പ്രതിഷേധ യോഗവും നടത്തി.
