ഉന: തെരഞ്ഞെടുപ്പ് പ്രചാരണത്തിനിടെ ഹെലികോപ്റ്ററിനു തകരാർ സംഭവിച്ചപ്പോൾ പരിഹരിക്കാൻ ചാടിയിറങ്ങി രാഹുൽ ഗാന്ധി. ഹെലികോപ്റ്ററിന്റെ തകരാർ പരിഹരിക്കുന്ന ചിത്രം ഇപ്പോൾ സോഷ്യൽ മീഡികളിൽ വൈറലാണ്. കോണ്ഗ്രസ് അധ്യക്ഷനെ അഭിനന്ദിച്ചു നിരവധി പേരാണു രംഗത്തെത്തിയിരിക്കുന്നത്.
ഹിമാചൽപ്രദേശിലെ ഉനയിൽ വച്ചാണ് രാഹുൽ ഗാന്ധിയുടെ ഹെലികോപ്റ്ററിനു സാങ്കേതിക തകരാർ സംഭവിച്ചത്. തകരാർ പരിഹരിക്കാൻ വിദഗ്ധർ എത്തിയെങ്കിലും രാഹുൽ നോക്കിനിന്നില്ല. അദ്ദേഹവും മറ്റുള്ളവർക്കൊപ്പം പങ്കുചേർന്നു.
’ഉനയിൽ വച്ചു ഹെലികോപ്റ്ററിനു തകരാറുണ്ടായി, എല്ലാവരും ഒന്നിച്ചുനിന്ന് അക്കാര്യം പെട്ടെന്നു പരിഹരിച്ചു. നല്ല ടീം വർക്കാണു പ്രശ്നം പെട്ടെന്നു പരിഹരിക്കാൻ സഹായിച്ചത്’- രാഹുൽ ഇസ്റ്റഗ്രാമിൽ പങ്കുവച്ച ചിത്രത്തോടൊപ്പം കുറിച്ചു. ലോക്സഭാ തെരഞ്ഞെടുപ്പിന്‍റെ ഏഴാംഘട്ടമായ മേയ് 19നാണ് ഹിമാചലിൽ വോട്ടെടുപ്പ് നടക്കുന്നത്.
