പത്തനംതിട്ട: സിപിഎം പത്തനംതിട്ട ഫേസ്ബുക്ക് പേജിൽ രാഹുൽ മാങ്കൂട്ടത്തിലിന്‍റെ പ്രചാരണ വീഡിയോ.”പാലക്കാട് എന്ന സ്നേഹ വിസ്മയം” എന്ന് അടിക്കുറിപ്പോടെയാണ് സിപിഎമ്മിന്‍റെ പേജിൽ വീഡിയോ പങ്കുവച്ചത്. 63,000 ഫോളോവേഴ്സ് ഉള്ള പേജിൽ അബദ്ധത്തിൽ പോസ്റ്റ് ചെയ്തതാണ് വീഡിയോ.
സംഭവം ശ്രദ്ധയിൽപെട്ട ഉടൻതന്നെ ദൃശ്യങ്ങൾ ഒഴിവാക്കി. പിന്നാലെ സിപിഎം ജില്ലാ നേതൃത്വം പ്രതികരണവുമായി രംഗത്തെത്തി. വീഡിയോ പങ്കുവയ്ക്കപ്പെട്ടത് സിപിഎമ്മിന്‍റെ ഔദ്യോഗിക പേജ് അല്ല എന്ന് സിപിഎം പത്തനംതിട്ട ജില്ലാ സെക്രട്ടറി കെ. പി. ഉദയഭാനു പറഞ്ഞു. മാത്രമല്ല പേജ് സിപിഎമ്മിന്‍റെ പേരിലുള്ള വ്യാജ അക്കൗണ്ട് ആണെന്നും അദ്ദേഹം വ്യക്തമാക്കി.
അതേസമയം, പേജിന്‍റെ അഡ്മിന്‍ പാനല്‍ ആരാണെന്ന് കൃത്യമായി മനസിലാക്കാന്‍ സാധിച്ചിട്ടില്ലെങ്കിലും സിപിഎം ജില്ലാ സെക്രട്ടറിയംഗം ഉള്‍പ്പടെയുള്ളവര്‍ പാനലിലുണ്ടെന്നാണ് വിവരം. ഔദ്യോഗികമായ ചുമതലയില്ലാത്തവര്‍ പാനലിലുണ്ടെന്നും അവര്‍ അബദ്ധവശാലോ ബോധപൂര്‍വമായോ ഇടപെട്ടിട്ടുണ്ടോ എന്നാണ് സംശയം.
