ചെന്നൈ: തമിഴ്നാട് മന്ത്രി വി. സെന്തിൽ ബാലാജിയുടെ സഹോദരന്‍റെ വീട്ടിൽ റെയ്ഡിനെത്തിയ ആദായ നികുതി ഉദ്യോഗസ്ഥരെ മന്ത്രിയുടെ അനുയായികൾ ആക്രമിച്ചു.
സംഭവത്തെത്തുടർന്ന് വനിതയടക്കമുള്ള ഉദ്യോഗസ്ഥരെ ആശുപത്രിയിൽ പ്രവേശിപ്പിച്ചു. മന്ത്രിയുടെ സഹോദരന്‍റെ കരൂരിലെ വീട്ടിൽ റെയഡ് നടത്താനെത്തിയപ്പോഴാണ് സംഭവം.
ഐടി ഉദ്യോഗസ്ഥരുടെ കാറിന്‍റെ മുൻവശത്തെ കണ്ണാടി തകർന്നു. മർദനത്തെത്തുടർന്ന് ഐടി ഉദ്യോഗസ്ഥർ കരൂർ എസ്പിയുടെ ഓഫീസിൽ അഭയം പ്രാപിച്ചു.
പരാതി നൽകിയിട്ടും പോലീസ് എഫ്ഐആർ രജിസ്റ്റർ ചെയ്തില്ലെന്ന് ഉദ്യോഗസ്ഥർ ആരോപിച്ചു. എന്നാൽ, അന്വേഷണം തുടരുകയാണെന്നും സംഭവം നടന്ന സമയംതന്നെ സ്ഥലത്തെത്തി ആൾക്കൂട്ടത്തെ പിരിച്ചുവിട്ടെന്നും എസ്പി ഡി. സുന്ദരവദനം പറഞ്ഞു.
സിഐഎസ്എഫ് സുരക്ഷയോടെ‌യാണ് പിന്നീട് റെയ്ഡ് പൂർത്തിയാക്കിയത്.ഉദ്യോഗസ്ഥരെ തടസപ്പെടുത്തരുതെന്ന് തന്‍റെ അനുയായികളോട് പറഞ്ഞിരുന്നതായി മന്ത്രി ബാലാജി മാധ്യമപ്രവർത്തകരോട് പറഞ്ഞു.
മതിൽ ചാടിക്കടന്നാണ് ഉദ്യോഗസ്ഥരെത്തിയത്. വാതിൽ തുറക്കുന്നതു വരെ ഉദ്യോഗസ്ഥർക്ക് കാത്തിരിക്കാമായിരുന്നുവെന്നും അദ്ദേഹം പറഞ്ഞു. വനിതാ ഉദ്യോഗസ്ഥയെ ആൾക്കൂട്ടം ആക്രമിക്കുന്നതിന്‍റെയും ഒരാൾ ഉദ്യോഗസ്ഥരുടെ വാഹനം കേടുവരുത്തുന്നതിന്‍റെയും ദൃശ്യങ്ങൾ വൈറലായി.
അതേസമയം, ഐടി ഉദ്യോഗസ്ഥർ തങ്ങളെയാണ് മർദിച്ചതെന്ന് ഡിഎംകെ പ്രവർത്തകർ ആരോപിച്ചു. മന്ത്രിയുടെ സഹോദരന്‍റെ വീടും സുഹൃത്തുക്കളുടെ സ്ഥലവും ഉൾപ്പെടെ 40 സ്ഥലങ്ങളിൽ പരിശോധന നടന്നു.
