ട്രാക്കിലൂടെ ട്രെയിന്‍ ചീറിപ്പാഞ്ഞു വരുമ്പോള്‍ തലച്ചുമടും ബാഗുകളും താങ്ങി റെയില്‍വേ ട്രാക്കിലൂടെ നടന്നു നീങ്ങിയ രണ്ട് വൃദ്ധകളെ ഞൊടിയില്‍ രക്ഷപ്പെടുത്തി റെയില്‍വേ പോലീസ്.
മധ്യപ്രദേശിലെ ഹൊഷങ്കാബാദിലാണ് സംഭവം. സംഭവത്തിന്റെ സിസിടിവി ദൃശ്യം സമൂഹമാധ്യമങ്ങളില്‍ വ്യാപകമായി പ്രചരിക്കുന്നുണ്ട്.
റെയില്‍വേ ട്രാക്കുകള്‍ ഓരോന്നായി കടന്ന് പ്ലാറ്റ്‌ഫോമിലേക്ക് കയറാനായിരുന്നു വൃദ്ധകളുടെ ശ്രമം. ദൂരെ നിന്നും ട്രെയിന്‍ വരുന്നതു കണ്ട ഇവര്‍ അതേ ട്രാക്കിലൂടെ തന്നെ ഓടിയെത്തുകയായിരുന്നു.
ഇതുകണ്ട റെയില്‍വേ പോലീസ് ഉദ്യോഗസ്ഥര് വേഗം അവരുടെ കൈപിടിച്ച് പ്ലാറ്റ്‌ഫോമിലേക്ക് വലിച്ചിട്ടു. സമീപമുണ്ടായിരുന്ന യാത്രക്കാരും സഹായത്തിനെത്തി.
‘സുരക്ഷയാണ് പരമപ്രധാനം. അവിടെയുണ്ടായിരുന്ന ആര്‍പിഎഫ്, ജിആര്‍പി ഉദ്യോഗസ്ഥന്മാര് ജാഗ്രത പുലര്‍ത്തിയതുകൊണ്ടാണ് രണ്ടുപേരെ രക്ഷപ്പെടുത്താനായത്. എല്ലായ്‌പ്പോഴും ഓവര്‍ ബ്രിഡ്ജിലൂടെ തന്നെ പ്ലാറ്റ്‌ഫോമിലേക്ക് കടക്കാന്‍ ശ്രമിക്കുക’.വിഡിയോ പങ്കുവച്ച് റെയില്‍വേ മന്ത്രാലയം കുറിച്ചു.
