തെക്കുപടിഞ്ഞാറൻ മൺസൂൺ ഇതിനകം തന്നെ മുംബൈയിലേക്ക് എത്തി കഴിഞ്ഞു. നഗരം ഇപ്പോൾ കനത്ത മഴയ്ക്ക് സാക്ഷ്യം വഹിക്കുകയാണ്. മഴയെത്തുടർന്ന് കഴിഞ്ഞയാഴ്ച മുംബൈയിൽ പലയിടത്തും വെള്ളക്കെട്ടുകൾ രൂപപ്പെടുകയും ചെയ്തു.
എന്നാൽ ഇതിനിടെ സോഷ്യൽ മീഡിയയിൽ മഴക്കാലവുമായി ബന്ധപ്പെട്ട ഹൃദയസ്പർശിയായ ഒരു വീഡിയോ പ്രചരിച്ചു. റിദ്ദി സുർത്തി ഇൻസ്റ്റാഗ്രാമിൽ പങ്കിട്ട വീഡിയോയിൽ വെള്ളക്കെട്ടുള്ള റോഡിൽ മുംബൈ മഴ ആസ്വദിക്കുന്ന കുട്ടിയെ കാണാം. മുംബൈയിലെ വെള്ളപ്പൊക്കമുള്ള റോഡിൽ തെരുവ് നായ്ക്കൾക്കൊപ്പം സന്തോഷത്തോടെ കളിക്കുകയാണ് കുട്ടി.
വൈറലായ ദൃശ്യങ്ങളിൽ തെരുവ് നായ്ക്കളുടെ മേൽ കുട്ടി വെള്ളം തെറിപ്പിക്കുന്നതും കാണാം. മഴ തുടരുമ്പോഴും നായ്ക്കളും കുട്ടിയും മൺസൂൺ ആസ്വദിച്ച് ചാടി കളിക്കുകയാണ് വെള്ളക്കെട്ടിൽ. “ബോംബെയിലെ മഴ തികച്ചും വ്യത്യസ്തമായ അനുഭവമാണ് ” എന്നായിരുന്നു വീഡിയോയ്‌ക്കൊപ്പം പങ്കിട്ട അടിക്കുറിപ്പ്.
വീഡിയോ പെട്ടെന്ന് തന്നെ ഇൻസ്റ്റഗ്രാമിൽ ശ്രദ്ധ നേടി. ഇതിനോടകം തന്നെ 2.6 ദശലക്ഷത്തിലധികം വ്യൂസും വീഡിയോയ്ക്ക് ലഭിച്ചു. ‘ഈ വീഡിയോ വളരെ സന്തോഷം നിറഞ്ഞതാണ്. മഴ, കുട്ടി കളിക്കുന്നു, നായ്ക്കൾ ചാടുന്നു, നിങ്ങൾ ചിരിക്കുന്നു. ഹൃദയസ്പർശിയായ ഒരു വീഡിയോ’ എന്നിങ്ങനെയാണ് വീഡിയോയ്ക്ക് ലഭിച്ചിരിക്കുന്ന കമന്‍റുകൾ.
