കരുവാരകുണ്ട്: വീടിന്‍റെ അടുപ്പിൽ നിന്ന് രാജവെന്പാലയെ പിടികൂടി. കരുവാരകുണ്ട് കക്കറ വായനശാലയ്ക്കു സമീപത്തെ മുതിരികുളയാൻ മുഹമ്മദിന്‍റെ ആൾ താമസമില്ലാത്ത വീട്ടിൽ നിന്നാണ് രാജവെന്പാലയെ കണ്ടത്. മുഹമ്മദ് തന്‍റെ കാർഷിക വിളകൾ സൂക്ഷിക്കാൻ ഉപയോഗിക്കുന്ന വീടാണിത്.
ഇത്തരത്തിൽ കാർഷിക വിളകളുമായി മുഹമ്മദും ഭാര്യയും എത്തിയ സമയത്ത് ശബ്ദം കേട്ടതിനെ തുടർന്ന് നടത്തിയ പരിശോധനയിലാണ് പാന്പിനെ കണ്ടത്. ഉടൻ തന്നെ നാട്ടുകാരെ വിവരമറിയിക്കുകയും നിലന്പൂർ റാപ്പിഡ് റെസ്പോണ്സ് ടീമിനെ വിളിച്ചു വരുത്തുകയുമായിരുന്നു.
പാന്പുപിടുത്ത വിദഗ്ദൻ സി.ടി.അബ്ദുൾ അസീസ് എത്തിയാണ് പാന്പിനെ പിടികൂടിയത്. ആർആർടി അംഗങ്ങളായ.വിപിൻ, തോമസ് എന്നിവരും സംഘത്തിലുണ്ടായിരുന്നു. രണ്ട് വയസ് പ്രായമായ പെണ്‍രാജവെന്പാലയ്ക്ക് എട്ടുഅടിയോളം നീളമുണ്ട്. ഇതിനെ ഉൾവനത്തിൽ തുറന്നു വിടുമെന്ന് ടീം അംഗങ്ങൾ അറിയിച്ചു.
