പ്രേക്ഷകരെ ആവേശത്തിരയിലാറാടിച്ച ബ്രഹ്മാണ്ഡ ചിത്രം ബാഹുബലിയുടെ രണ്ടാം ഭാഗം മുന്നേറുകയാണ്. ചിത്രത്തിലെ മുഖ്യ കഥാപാത്രങ്ങളിലൊരാളാണ് ശിവകാമി എന്ന കഥാപാത്രമായി പ്രത്യക്ഷപ്പെട്ട രമ്യാകൃഷ്ണന്‍. ഏറെ വെല്ലുവിളികള്‍ നിറഞ്ഞ കഥാപാത്രമായിരുന്നു മഹിഷ്മതിയിലെ ശിവകാമിയുടേതെന്ന് രമ്യാ കൃഷ്ണന്‍ പറയുന്നു.ബാഹുബലിയുടെ തിരക്കഥ കേള്‍ക്കുന്നതിനിടയില്‍ ഒരിക്കല്‍ പോലും തനിക്കു ഉറക്കം വന്നില്ലെന്നും സാധാരണ സംവിധായകര്‍ കഥ പറയുമ്പോള്‍ ഉറക്കം വരാറുണ്ടെന്നും നടി പറയുന്നു. ഇമ ചിമ്മാതെയാണ് താന്‍ ആ കഥ കേട്ടിരുന്നതെന്നും അവര്‍ പറഞ്ഞു. ചിത്രീകരണത്തിനിടെ നിരവധി തവണ പരിക്കേല്‍ക്കുകയും ചെയ്തു.
ചിത്രത്തില്‍ സ്വന്തം ശബ്ദം തന്നെ ഉപയോഗിക്കണം എന്ന് സംവിധായകനു നിര്‍ബന്ധം ഉണ്ടായിരുന്നു. ശക്തമായ ഒഴുക്കുള്ള വെള്ളത്തില്‍ കൂടി കുഞ്ഞു ബാഹുബലിയെ ഉയര്‍ത്തി നീങ്ങുന്ന രംഗമായിരുന്നു ചിത്രത്തിലെ ഏറ്റവും സാഹസികമായത്. കുഞ്ഞു ബാഹുബലിയെ ഉയര്‍ത്തിപിടിച്ചു വെള്ളത്തില്‍ കുടി നീങ്ങേണ്ടി വന്ന ഈ രംഗം തന്നെയായിരുന്നു അഭിനയിക്കാന്‍ ഏറ്റവും ബുദ്ധിമുട്ടിയിരുന്നതെന്നു രമ്യാ കൃഷ്ണന്‍ പറഞ്ഞു. വെള്ളച്ചാട്ടത്തിനു നല്ല ഒഴുക്കുണ്ടായിരുന്നതിനാല്‍ മുങ്ങി പോകുമോ എന്നു പേടിയുണ്ടായിരുന്നു. എന്നാല്‍ എന്തുഭയം ഉണ്ടെങ്കിലും അതു പുറത്തു കാണിക്കരുത് എന്നും സംവിധായകന്‍ നിര്‍ദേശിച്ചിരുന്നു. അതുകൊണ്ടു തന്നെ പേടി പുറത്തു കാണിക്കാതെയായിരുന്നു ആ രംഗം അഭിനയിച്ചതെന്നും രമ്യാ കൃഷ്ണന്‍ പറയുന്നു.
