ആലുവ: സുഹൃത്ത് ജയിലിലായപ്പോൾ അദ്ദേഹത്തിന്‍റെ ഭാര്യയെ ഭീഷണിപ്പെടുത്തി ഒരു മാസക്കാലം ലൈംഗികമായി പീഡിപ്പിച്ച യുവാവിനെ ആലുവ പോലീസ് അറസ്റ്റുചെയ്തു. കാസർഗോഡ് ചെറുവത്തൂർ കടങ്ങോട് കോട്ടക്കട്ടിക്ക് മുത്തലിബിനെ (33)യാണ് ആലുവ ഈസ്‌റ്റ് പ്രിൻസിപ്പൽ എസ്ഐ എം.എസ്. ഫൈസൽ അറസ്റ്റു ചെയ്തത്.
ഒരു വഞ്ചനാക്കേസിൽ ജയിലിലായ സുഹൃത്തിന്റെ ഭാര്യയെയാണ് പീഡിപ്പിച്ചത്. യുവതിയെയും കുട്ടിയെയും കൊല്ലുമെന്ന് ഭീഷണിപ്പെടുത്തി മുത്തലിബ് ആലുവയിലെ ഇയാളുടെ താമസസ്ഥലത്തേക്കു കൊണ്ടുവന്നായിരുന്നു പീഡനം. ഭർത്താവ് ജയിലിൽ നിന്നിറങ്ങിയ ശേഷം യുവതിയെ രക്ഷിക്കുകയായിരുന്നെന്ന് പോലീസ് പറയുന്നു. ഇതിനു ശേഷമാണ് പരാതി നൽകിയത്.
വിസ കച്ചവടവുമായി ബന്ധപ്പെട്ടാണ് പ്രതി ആലുവയിൽ എത്തിയത്. യുവതിയും ഭർത്താവും പുത്തൻകുരിശ് ഭാഗത്തായിരുന്നു താമസം. ആ സമയത്ത് ഇയാൾ ഇടയ്ക്ക് അവിടെ പോകാറുണ്ടായിരുന്നു. ഇതിനിടയിലാണ് ഒരു വഞ്ചനാക്കേസിൽ യുവതിയുടെ ഭർത്താവ് ജയിലിലായത്. ഗൾഫിൽ നിന്ന് നാട്ടിലെത്തിയ മുത്തലിബ് ഫേസ്ബുക്കിലൂടെ പരിചയപ്പെട്ട മറ്റൊരു യുവതിയെ പീഡിപ്പിച്ചതിന് കരുവാരക്കുണ്ട് പോലീസ് സ്റ്റേഷനിൽ കേസുണ്ട്.
