ചിങ്ങവനം: പ്രായപൂർത്തിയാകാത്ത പെണ്‍കുട്ടിയെ ഫേസ്ബുക്കിലൂടെ സ്നേഹം നടിച്ച് തട്ടിക്കൊണ്ടു പോയി പീഡിപ്പിച്ച കേസിൽ യുവാവിനെ ചിങ്ങവനം പോലീസ് അറസ്റ്റു ചെയ്തു. മേലുകാവ് വല്യേട്ടിൽ ജോർജ്(അപ്പു-21) ആണ് അറസ്റ്റിലായത്. ചിങ്ങവനം പോലീസ് പരിധിയിൽ പെട്ട 16 കാരിയായ പെണ്‍കുട്ടിയെ ഒരാഴ്ച മുൻപ് കാണാനില്ലെന്ന് കാട്ടി മാതാപിതാക്കൾ ചിങ്ങവനം പോലീസിൽ പരാതി നൽകിയിരുന്നു.
തുടർന്നുള്ള അന്വേഷണത്തിൽ പെണ്‍കുട്ടിയെ മേലുകാവിൽ നിന്നും കണ്ടെത്തിയിരുന്നു. വൈദ്യപരിശോധനയിലാണ് പെണ്‍കുട്ടി പീഡിപ്പിക്കപ്പെട്ട വിവരം അറിയുന്നത്. തുടർന്ന് ബുധനാഴ്ച ചങ്ങനാശേരി ഡിവൈഎസ്പി ആർ. ശ്രീകുമാറിന്‍റെ നേതൃത്വത്തിലുള്ള പോലീസ് സംഘം പ്രതിയെ മേലുകാവിൽ നിന്നു പിടികൂടുകയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡു ചെയ്തു.
