കൊച്ചി: സിനിമാ മോഹം നൽകി പെണ്‍കുട്ടിയെ പീഡിപ്പിച്ച കേസിൽ മധ്യവയസ്കൻ അറസ്റ്റിൽ. ചാവക്കാട് സ്വദേശി ഇസ്മയിലിനെനെയാണ് പാലാരിവട്ടം പോലീസ് അറസ്റ്റു ചെയ്തത്.
സിനിമയിൽ അഭിനയിക്കാനും ടിവി പരിപാടികളിൽ അവതാരകയായും അവസരം വാങ്ങി കൊടുക്കാമെന്നു വാഗ്ദാനം നൽകിയായിരുന്നു പീഡനം. സിനിമാരംഗത്തെ ഉന്നതരുമായി ബന്ധമുണ്ടെന്നു വിശ്വസിപ്പിച്ചു പെണ്‍കുട്ടിയേയും കൂട്ടുകാരികളെയും അഭിമുഖത്തിനെന്നു പറഞ്ഞു കൂട്ടിക്കൊണ്ടു പോയ പ്രതി രണ്ടുപേരെ സെലക്ട് ചെയ്തതായി അറിയിച്ചു.
തുടർന്നു ഹോട്ടൽ മുറിയിൽ മാഡം ഇന്‍റർവ്യൂ ചെയ്യാൻ കാത്തിരിപ്പുണ്ടെന്നു പറഞ്ഞു. ഇതു വിശ്വസിച്ചു മുറിയിലെത്തിയ പെണ്‍കുട്ടിയെ വാതിൽ പൂട്ടിയിട്ടശേഷം മാനഭംഗപ്പെടുത്തുകയായിരുന്നുവെന്നു പോലീസ് പറഞ്ഞു.
പെണ്‍കുട്ടിയുടെ പരാതിയിൽ ഇസ്മയിലിന്‍റെ ഫോണ് നന്പർ തിരിച്ചറിഞ്ഞു നടത്തിയ അന്വേഷണത്തിൽ കഴിഞ്ഞ ദിവസം രാത്രി ചാവക്കാട്ടെ വീട്ടിൽനിന്നാണ് ഇയാളെ പിടികൂടിയത്. ഇടപ്പള്ളിയിലെ വാടകവീട്ടിലാണ് ഇയാൾ താമസിച്ചുവന്നിരുന്നത്.
