കുമ്പള: കലോത്സവത്തിനിടയില്‍ ഓട്ടോയില്‍ കയറ്റിക്കൊണ്ടു പോയി ആളൊഴിഞ്ഞ വീട്ടില്‍വച്ച് പീഡിപ്പിക്കപ്പെട്ട എട്ടാം ക്ലാസ് വിദ്യാര്‍ഥിനിയെ അഞ്ചു മാസം മുമ്പ് മറ്റൊരു യുവാവും പീഡിപ്പിച്ചതായി പരാതി. പെണ്‍കുട്ടിയുടെ മൊഴിയുടെ അടിസ്ഥാനത്തില്‍ ജോഡ്ക്കട്ട കിദൂരിലെ ശശികുമാര്‍ എന്ന തമ്മു (19)വിനെ കുമ്പള ഇന്‍സ്പെക്ടര്‍ കെ.പ്രേംസദന്‍, എസ്‌ഐ ടി.വി. അശോകന്‍ എന്നിവര്‍ ചേര്‍ന്ന് അറസ്റ്റ് ചെയ്തു.
പ്രതിയെ വൈദ്യപരിശോധനയ്ക്ക് ശേഷം കോടതിയില്‍ ഹാജരാക്കി. 2018 മേയ് രണ്ടിന് തമ്മു തന്നെ പീഡിപ്പിച്ചുവെന്നാണ് പെണ്‍കുട്ടിയുടെ മൊഴി. ഏതാനും ദിവസം മുമ്പ് സ്കൂള്‍ കലോത്സവം നടക്കുന്നതിനിടയില്‍ പെണ്‍കുട്ടിയെ ഓട്ടോയില്‍ കയറ്റികൊണ്ടുപോയി ആള്‍ത്താമസമില്ലാത്ത വീട്ടില്‍ വച്ച് പീഡിപ്പിച്ചുവെന്നതിന് ഓട്ടോ ഡ്രൈവറായ ബംബ്രാണ വയലിലെ കിരണ്‍ രാജ് ഷെട്ടി (21)യെ കഴിഞ്ഞദിവസം അറസ്റ്റ് ചെയ്തിരുന്നു. ഇയാളെ കോടതി രണ്ടാഴ്ചത്തേക്ക് റിമാൻഡ് ചെയ്തു.
കലോത്സവത്തിനിടയില്‍ കാണാതായ പെണ്‍കുട്ടി തിരിച്ചെത്തിയപ്പോള്‍ അധ്യാപികമാര്‍ ചോദ്യം ചെയ്തപ്പോഴാണ് സംഭവം പുറത്തായത്. വിവരമറിഞ്ഞ് ചൈല്‍ഡ് ലൈന്‍ അധികൃതരെത്തി പെണ്‍കുട്ടിയില്‍നിന്ന് മൊഴിയെടുക്കുകയും ചെയ്തതോടെയാണ് കൂടുതല്‍ വിവരങ്ങള്‍ അറിഞ്ഞത്.
പോലീസ് കൂടുതല്‍ മൊഴിയെടുത്തപ്പോഴാണ് അഞ്ചു മാസം മുമ്പ് ആദ്യത്തെ പീഡന സംഭവം പെണ്‍കുട്ടി വ്യക്തമാക്കിയതും കേസെടുത്ത് പ്രതിയെ അറസ്റ്റ് ചെയ്തതും. പോക്സോ ആക്ട് പ്രകാരമാണ് കേസ്.
