ജനത കര്‍ഫ്യൂവിന് ആഹ്വാനം ചെയ്ത പ്രധാനമന്ത്രിയെ പരിഹസിക്കുന്ന തിരക്കിലാണ് കുറച്ച് പ്രബുദ്ധ മലയാളി ട്രോളന്മാര്‍. കൊറോണയുടെ ഭീകരത മനസ്സിലാക്കാതെ ട്രോളുകള്‍ തയ്യാറാക്കാന്‍ തിരക്കുകൂട്ടുന്ന ഇത്തരക്കാര്‍ക്ക് ഇപ്പോള്‍ മറുപടിയുമായി രംഗത്തെത്തിയിരിക്കുകയാണ് റസൂല്‍ പൂക്കുട്ടി.
മലയാളികള്‍ക്ക് ജനതാ കര്‍ഫ്യൂ എന്താണെന്ന് മനസിലാകണമെന്നില്ലെന്നും ഞായറാഴ്ച ഹര്‍ത്താലാണെന്ന് പറയുന്നതാകും നല്ലതെന്നും റസൂല്‍ പൂക്കുട്ടി പറയുന്നു. ട്വിറ്ററിലൂടെയാണ് പൂക്കുട്ടിയുടെ പരിഹാസം.
പ്രധാനമന്ത്രിയുടെ ജനതാ കര്‍ഫ്യൂ ആഹ്വാനത്തെ പിന്തുണച്ചാണ് റസൂല്‍പൂക്കുട്ടി രംഗത്തെത്തിയത്. ‘പ്രിയ പ്രധാനമന്ത്രി, ജനത കര്‍ഫ്യൂ എന്ന് പറഞ്ഞാല്‍ മലയാളികള്‍ക്ക് മനസിലാവില്ല. ഞായറാഴ്ച ഹര്‍ത്താലാണെന്ന് അവരോട് പറയൂ. കൂടുതല്‍ മദ്യം കരുതാന്‍ അവരെ അനുവദിക്കൂ.’ പൂക്കുട്ടി പറയുന്നു.
കോവിഡ്19 ബാധ തടയുന്നതിനായി ഈ ഞായറാഴ്ച ജനത്തിനു വേണ്ടി ജനം സ്വയം നടത്തുന്ന ‘ജനതാ കര്‍ഫ്യൂ’ നടപ്പാക്കണമെന്നു പ്രധാനമന്ത്രി ആവശ്യപ്പെട്ടിരുന്നു.
രാവിലെ ഏഴു മുതല്‍ രാത്രി ഒന്‍പതു വരെ ആരും വീട്ടില്‍നിന്നു പുറത്തിറങ്ങരുത്. വീട്ടില്‍ത്തന്നെ തുടരണം എന്നായിരുന്നു പ്രധാനമന്ത്രിയുടെ ആവശ്യം.
ഇതിനെ പരിഹസിച്ചാണ് നിരവധി മലയാളികള്‍ ട്രോളുകള്‍ ഇറക്കിയത്. മോക്ഡ്രിലിനു സമാനമാണ് ഇതെന്ന് ഡോക്ടര്‍മാര്‍ തന്നെ പറയുമ്പോഴാണ് കാര്യത്തിന്റെ ഗൗരവം മനസ്സിലാക്കാതെ ചിലര്‍ ട്രോളുമായി ഇറങ്ങിയിരിക്കുന്നത്.
