2018ല്‍ ഇറങ്ങിയ തമിഴ് ചിത്രമായ മാരി 2 ഏറ്റവും ശ്രദ്ധേയമായത് അതിലെ റൗഡി ബേബി എന്ന ഗാനം നിമിത്തമായിരുന്നു.
നടന്‍ ധനുഷും നായിക സായി പല്ലവിയും തകര്‍ത്താടിയ ആ ഗാനം യൂട്യൂബിന്‍റെ ചരിത്രത്തിലെ തന്നെ ഏറ്റവും കാഴ്ചക്കാരെ ലഭിച്ച വീഡിയോകളില്‍ ഒന്നായിരുന്നു.
അതേ തുടര്‍ന്ന് ലോകത്തിന്‍റെ വിവിധ ഭാഗങ്ങളില്‍ നിന്നും നിരവധി പേരാണ് ഈ ഗാനത്തിന് ചുവടുവച്ച് രംഗത്ത് എത്തിയത്.
അതോടെ സാധാരണക്കാര്‍ക്കിടയില്‍ പോലും ഈ ഗാനം ട്രെന്‍ഡിംഗ് ആയി മാറിയിരുന്നു.
ഇപ്പോളിതാ നാലു വര്‍ഷങ്ങള്‍ക്കിപ്പുറവും അതിന്‍റെ അലയൊലികള്‍ അവസാനിക്കുന്നില്ല എന്ന സൂചനയുമായി ഒരു വീഡിയോ സോഷ്യല്‍ മീഡിയയില്‍ ഇപ്പോള്‍ തരംഗമായിരിക്കുകയാണ്.
ഇത്തവണ കോല്‍ക്കത്തയില്‍ നിന്നാണ് റൗഡി ബേബി വരുന്നത്. കോല്‍ക്കത്തിയിലുള്ള ദമ്പതിമാരായ സൗരഭ്, അനൂഷ എന്നിവരാണ് ഈ ഗാനത്തിന് ചുവടുമായി എത്തിയിരിക്കുന്നത്.
ജോഡി അനൂരഭ് എന്ന ഇന്‍സ്റ്റഗ്രാമില്‍ പങ്കുവച്ചിരിക്കുന്ന വീഡിയോയില്‍ ദമ്പതികള്‍ ധനുഷും സായി പല്ലവിയും ഈ പാട്ടിനായി ധരിച്ചിരിക്കുന്നതിന് സമാനമായ വസ്ത്രങ്ങളാണ് ഉപയോഗിച്ചിരിക്കുന്നത്.
ഏതായാലും ഇവരുടെ നൃത്തം സമൂഹ മാധ്യമങ്ങള്‍ ഏറ്റെടുത്ത് കഴിഞ്ഞു. നിരവധിയാളുകളാണ് ഈ ദമ്പതിമാരെ അഭിനന്ദിച്ച് കമന്‍റുകളിടുന്നത്.
