ജാംനഗർ: ഇന്ത്യൻ ക്രിക്കറ്റ് താരം രവീന്ദ്ര ജഡേജയുടെ ഭാര്യയ്ക്കു നേരെ ഗുജറാത്തിൽ പോലീസ് ഉദ്യോഗസ്ഥന്റെ അതിക്രമം. തിങ്കളാഴ്ച വൈകിട്ട് ജാംനഗറിൽ വാഹനങ്ങൾ തമ്മിൽ കൂട്ടിമുട്ടിയതിനെ തുടർന്നുണ്ടായ തർക്കത്തിലാണ് ജഡേജയുടെ ഭാര്യയെ സഞ്ജയ് അഹിർ എന്ന പോലീസുകാരൻ ആക്രമിച്ചത്.
തിങ്കളാഴ്ച വൈകിട്ട് ജഡേജയുടെ ഭാര്യ റിവാബയുടെ കാർ സഞ്ജയ് ഓടിച്ചിരുന്ന ബൈക്കുമായി കൂട്ടിമുട്ടി. അപകടം നടന്ന ഉടൻതന്നെ കാറിനു പുറത്തിറങ്ങിയ റിവാബയെ കോണ്സ്റ്റബിളായ സഞ്ജയ് ആക്രമിക്കുകയായിരുന്നു. ആക്രമണത്തിൽ റിവാബയ്ക്കു പരിക്കേറ്റു. അപകടം നടക്കുന്പോൾ അമ്മയും കുഞ്ഞും കാറിലുണ്ടായിരുന്നു.
റിവാബയുടെ പരാതിയുടെ അടിസ്ഥാനത്തിൽ കേസ് രജിസ്റ്റർ ചെയ്തതായി പോലീസ് അറിയിച്ചു. സഞ്ജയ്ക്കെതിരേ വകുപ്പുതല അന്വേഷണത്തിനും സസ്പെൻഷനും സാധ്യതയുണ്ട്.
