ജാംനഗർ: ഇന്ത്യൻ ക്രിക്കറ്റ് താരം രവീന്ദ്ര ജഡേജയുടെ ഭാര്യയ്ക്കു നേരെ ഗുജറാത്തിൽ പോലീസ് ഉദ്യോഗസ്ഥന്റെ അതിക്രമം. തിങ്കളാഴ്ച വൈകിട്ട് ജാംനഗറിൽ വാഹനങ്ങൾ തമ്മിൽ കൂട്ടിമുട്ടിയതിനെ തുടർന്നുണ്ടായ തർക്കത്തിലാണ് ജഡേജയുടെ ഭാര്യയെ സഞ്ജയ് അഹിർ എന്ന പോലീസുകാരൻ ആക്രമിച്ചത്.
സംഭവവുമായി ബന്ധപ്പെട്ട് പോലീസ് ഉദ്യോഗസ്ഥനെ അറസ്റ്റ് ചെയ്തതായി ജില്ലാ പോലീസ് മേധാവി പ്രദീപ് സെജൂൾ പറഞ്ഞു. തിങ്കളാഴ്ച വൈകിട്ട് ജഡേജയുടെ ഭാര്യ റിവാബയുടെ കാർ ബൈക്കുമായി കൂട്ടിമുട്ടി. പ്രീത് ശർമ എന്നയാളാണ് ബൈക്ക് ഓടിച്ചിരുന്നത്. സഞ്ജയ് പിൻസീറ്റിൽ ഉണ്ടായിരുന്നു.
അപകടം നടന്ന ഉടൻതന്നെ കാറിനു പുറത്തിറങ്ങിയ റിവാബയെ കോണ്സ്റ്റബിളായ സഞ്ജയ് ആക്രമിക്കുകയായിരുന്നു. ആക്രമണത്തിൽ റിവാബയ്ക്കു പരിക്കേറ്റു. അപകടം നടക്കുന്പോൾ അമ്മയും കുഞ്ഞും കാറിലുണ്ടായിരുന്നു.
നിസാര പരിക്കേറ്റ പ്രീത് ശർമയെ അടുത്തുള്ള ആശുപത്രിയിൽ പ്രവേശിപ്പിച്ചു. ജഡേജ ആശുപത്രിയിലെത്തി ഇയാളെ സന്ദർശിച്ച് ആവശ്യമുള്ള ചികിത്സനൽകാൻ അധികൃതരോട് ആവശ്യപ്പെട്ടു. ഇയാൾ ഉടൻ ആശുപത്രി വിടുമെന്നാണ് റിപ്പോർട്ട്.
