കോട്ട: സരസ്വതി ദേവിയെ അപമാനിച്ചെന്നും മതവികാരം വ്രണപ്പെടുത്തിയെന്നും ആരോപിച്ച് സർക്കാർ സ്കൂള്‍ അധ്യാപികയെ സസ്‍പെന്‍ഡ് ചെയ്തു. രാജസ്ഥാനിലെ കൃഷ്ണഗഞ്ചിലുള്ള ലക്ഡായി ഗ്രാമത്തിൽ പ്രൈമറി അധ്യാപിക ഹേമലത ബൈരവയാണ് സസ്‍പെന്‍ഡ് ചെയ്തത്.
അധ്യാപികയ്ക്കെതിരേ നടപടി എടുത്ത വിവരം വിദ്യാഭ്യാസ മന്ത്രി പൊതുചടങ്ങിൽ വച്ച് അറിയിച്ചു. സ്കൂളിൽ സരസ്വതി ദേവിയുടെ പങ്ക് എന്താണെന്ന് ചോദിക്കുന്ന തരത്തിൽ ചിലരുടെ സ്വഭാവം മാറിയിട്ടുണ്ടെന്നും അവരെ താൻ സസ്‍പെന്‍ഡ് ചെയ്തെന്നും മന്ത്രി മദൻ ദിലവാർ പറഞ്ഞു.
അധ്യാപികയ്ക്കെതിരേ അച്ചടക്ക നടപടി സ്വീകരിക്കുകയാണെന്നും മതവികാരം വ്രണപ്പെടുത്തിയെന്ന പരാതിയിന്മേൽ അധ്യാപികയ്ക്കെതിരെ നടപടി സ്വീകരിച്ചുവരികയാണെന്നും ജില്ലാ വിദ്യാഭ്യാസ അധികൃതര്‍ അറിയിച്ചു.
സ്കൂളിലെ റിപ്പബ്ലിക് ദിനാഘോഷത്തിൽ സരസ്വതി ദേവിയുടെ ചിത്രം വയ്ക്കാൻ അനുവദിച്ചില്ലെന്നതാണ് അധ്യാപികയ്ക്കെതിരായ പരാതി.
ഗാന്ധിയുടെയും അംബേദ്കറിന്‍റേയും ചിത്രത്തോടൊപ്പം റിപ്പബ്ലിക് ദിനാഘോഷത്തിൽ സരസ്വതി ദേവിയുടെയും ചിത്രം കൂടി വയ്ക്കണമെന്ന് ചിലർ ആവശ്യപ്പെട്ടു. എന്നാൽ സ്കൂളിനും വിദ്യാഭ്യാസത്തിനും സരസ്വതി ദേവി ഒന്നും ചെയ്തിട്ടില്ലെന്ന് അധ്യാപിക പറഞ്ഞു. ഇതിനെതിരേയാണ് നടപടി.
