കോയമ്പത്തൂർ: തമിഴ്‌നാട് മോട്ടോർ വാഹന വകുപ്പ് കസ്റ്റഡിയിലെടുത്ത റോബിൻ ബസ് വിട്ടുനൽകി. പെർമിറ്റ് ലംഘനത്തിന് പിഴ അടച്ച ശേഷമാണ് തമിഴ്‌നാട് മോട്ടോർ വാഹന വകുപ്പ് ബസ് വിട്ടു നൽകിയത്.
10,000 രൂപ പിഴ നൽകിയ ശേഷമാണ് ബസ് ഉടമ ഗിരീഷിന് ബസ് വിട്ട് കൊടുക്കാൻ അധികൃതർ തയാറായത്. രണ്ടാം ദിവസം കോയമ്പത്തൂരിലേക്ക് സർവീസ് നടത്തിയപ്പോഴാണ് ബസ് കസ്റ്റഡിയിലെടുത്തത്. ബസിലുണ്ടായിരുന്ന യാത്രക്കാരെ അന്ന് രാത്രി തന്നെ നാട്ടിലേക്ക് തിരിച്ചെത്തിച്ചു.
വാളയാർ അതിർത്തി കടന്നപ്പോൾ പെർമിറ്റ് ലംഘനത്തിന് തമിഴ്‌നാട് മോട്ടോർ വാഹന വകുപ്പ് റോബിൻ ബസിനെ കസ്റ്റഡിയിലെടുത്തത്. കൂടാതെ പിഴ ഈടാക്കുകയും ചെയ്തു. കോയമ്പത്തൂർ സെൻട്രൽ ആർടിഒയുടെതാണ് നടപടി.
ഇന്ന് വൈകുന്നേരം അഞ്ച് മുതൽ കോയമ്പത്തൂരിൽ നിന്ന് പത്തനംതിട്ടയിലേക്ക് സർവീസ് പുനരാരഭിക്കുമെന്ന് ബസ് ഉടമ ഗിരീഷ് അറിയിച്ചു.
