വെസ്റ്റ് ഇൻഡീസിനെതിരേ ടെസ്റ്റ് ടീമിൽ ഇടംലഭിക്കാതിരുന്ന ഇന്ത്യൻ ഓപ്പണർ രോഹിത് ശർമ മുംബൈക്കായി വിജയ് ഹസാരെ ട്രോഫിയിൽ കളിക്കും. വിജയ് ഹസാരെ ട്രോഫിയുടെ നോക്കൗട്ടിൽ രോഹിതിന്റെ സാന്നിധ്യം മുംബൈക്ക് കരുത്താകും. ശ്രേയസ് അയ്യരാണ് മുംബൈ ടീമിന്‍റെ നായകൻ.
മുംബൈ ടൂർണമെന്‍റിന്‍റെ ഫൈനലിൽ എത്തിയാൽ വെസ്റ്റ് ഇൻഡീസിനെതിരായ ഏകദിന ടീമിലുള്ളതിനാൽ രോഹിതിന് കലാശപ്പോരാട്ടം നഷ്ടമാകും. ക്വാർട്ടറിൽ ബീഹാർ ആണ് മുംബൈയുടെ എതിരാളി. 14നാണ് മത്സരം.
ഏഷ്യ കപ്പിൽ ഇന്ത്യയെ കിരീടത്തിലെത്തിച്ച രോഹിത് ശർമ അഞ്ച് മത്സരങ്ങളിൽനിന്ന് 317 റണ്‍സ് നേടിയിരുന്നു. സ്ഥിരം ക്യാപ്റ്റനായ വിരാട് കോഹ് ലിയുടെ അഭാവത്തിൽ രോഹിത്തായിരുന്നു ഇന്ത്യയെ നയിച്ചത്. ഇന്ത്യ-വെസ്റ്റ് ഇൻഡീസ് ഏകദിന പരന്പരയിലെ ആദ്യ മത്സരം 21ന് ഗുവാഹത്തിയിലാണ്.
