മിലാൻ: പോർച്ചുഗീസ് സൂപ്പർ ഫുട്ബോളർ ക്രിസ്റ്റ്യാനോ റൊണാൾഡോ കരിയറിൽ 1000 മത്സരം പൂർത്തിയാക്കിയ ദിനം ഗോൾ വേട്ടയിൽ റിക്കാർഡ് കുറിച്ചു.
രാജ്യത്തിനും ക്ലബ്ബുകൾക്കുമായാണ് റൊണാൾഡോ 1000 മത്സരം തികച്ചത്. ഇറ്റാലിയൻ സീരി എ ഫുട്ബോളിൽ യുവന്‍റസിനായി സ്പാലിനെതിരേയായിരുന്നു റൊണാൾഡോയുടെ 1000-ാമത് മത്സരം. റൊണാൾഡോ ഗോൾ നേടിയ മത്സരത്തിൽ 2-1ന് യുവന്‍റസ് ജയിച്ചു. റൊണാൾഡോയ്ക്കൊപ്പം (39) ആരോണ് റാംസിയായിരുന്നു (60) യുവന്‍റസിന്‍റെ മറ്റൊരു ഗോൾ നേട്ടക്കാരൻ.
സീരി എയിൽ തുടർച്ചയായ 11-ാം മത്സരത്തിലും ഗോൾ നേടിയതോടെ റൊണാൾഡോ റിക്കാർഡിനൊപ്പമെത്തി. സീരി എയിൽ തുടർച്ചയായി ഏറ്റവും അധികം മത്സരങ്ങളിൽ ഗോൾ നേടിയ മൂന്നാമത് താരമായി റൊണാൾഡോ.
ഗബ്രിയേൽ ബാറ്റിസ്റ്റ്യൂട്ട (1994-95ൽ ഫിയോറെന്റീനയ്ക്കുവേണ്ടി), ഫാബിയോ ക്വാഗ്ലിയാറെല്ല (2018-19 സീസണിൽ സാംപ്ഡോറിയയ്ക്കുവേണ്ടി) എന്നിവർക്കൊപ്പമാണ് റൊണാൾഡോ ഇപ്പോൾ.
