തിരുവനന്തപുരം: റബറിന്‍റെ താങ്ങുവില ഉയർത്താത്തത് കേന്ദ്രസർക്കാരിന്‍റെ നിലപാട് മൂലമെന്ന് പറഞ്ഞ് കൈയൊഴിഞ്ഞു സംസ്ഥാന സർക്കാർ. താങ്ങുവില 250 രൂപയാക്കാൻ കേന്ദ്രത്തെസമീപിച്ചെങ്കിലും നടപടിയുണ്ടായില്ലെന്ന് കൃഷിമന്ത്രി പി. പ്രസാദ് നിയമസഭയിൽ പറഞ്ഞു.
കേന്ദ്രത്തിന്‍റെ രാജ്യാന്തര കരാറുകളാണ് റബറിന്‍റെ വിലയിടിവിന് കാരണമെന്നും മന്ത്രി വ്യക്തമാക്കി. കേന്ദ്ര സര്‍ക്കാരിന്‍റെ വിവിധ കരാറുകളാണ് റബര്‍ വില തകര്‍ച്ചക്കുള്ള കാരണം. കേന്ദ്ര സമീപനം ഒട്ടും അനുകൂലമല്ല. കേന്ദ്ര ധനമന്ത്രിയെ നേരത്തെ കണ്ടിട്ടും അനുകൂല നിലപാട് ഉണ്ടായില്ലെന്നും കൃഷിമന്ത്രി പറഞ്ഞു.
കേന്ദ്രസർക്കാരിന് ഇക്കാര്യത്തിൽ നിവേദനം നൽകുക മാത്രം ചെയ്തിട്ട് കാര്യമില്ലെന്നും സംസ്ഥാന സർക്കാർ ചെയ്യേണ്ട കാര്യങ്ങൾ ചെയ്യണമെന്നും മോൻസ് ജോസഫ് ആവശ്യപ്പെട്ടു.
കേന്ദ്ര സഹായത്തിന് കാത്തുനില്‍ക്കാതെ സംസ്ഥാന സര്‍ക്കാര്‍ വിഷയത്തില്‍ ഇടപെടണമെന്നും താങ്ങുവില 300 ആയി ഉയര്‍ത്തണമെന്നും മോന്സ് ജോസഫ് എംഎല്‍എ ആവശ്യപ്പെട്ടു. യുഡിഎഫ് കൊണ്ട് വന്ന അടിയന്തര പ്രമേയ നോട്ടീസിന് അവതരണാനുമതി നിഷേധിച്ച് കൊണ്ടുള്ള പ്രസംഗത്തിലാണ് കേന്ദ്രത്തെ ചാരി ഈ വിഷയത്തിൽ നിന്നും മന്ത്രി കയ്യൊഴിഞ്ഞത്.
റബര്‍ കര്‍ഷകരുടെ പ്രതിസന്ധി നിയമസഭാ നടപടികള്‍ നിര്‍ത്തിവെച്ച് ചര്‍ച്ച ചെയ്യമെന്നാവശ്യപ്പെട്ട് മോന്സ് ജോസഫ് എംഎല്‍എയാണ് അടിയന്തര പ്രമേയ നോട്ടീസ് നല്‍കിയത്.
ഉത്പാദന ചെലവിന്‍റെ വര്‍ധനവും വിലതകര്‍ച്ചയും മൂലം കേരളത്തിലെ റബര്‍ കര്‍ഷകര്‍ കടുത്ത പ്രതിസന്ധി നേരിടുന്ന സാഹചര്യത്തില്‍ റബ്ബറിന്‍റെ താങ്ങുവില 300 രൂപയായി ഉയര്‍ത്താന്‍ സര്‍ക്കാര്‍ നടപടി സ്വീകരിക്കാത്തത് സഭ നിര്‍ത്തിവെച്ച് ചര്‍ച്ച ചെയ്യണമെന്നാണ് അടിയന്തര പ്രമേയത്തിലൂടെ ആവശ്യപ്പെട്ടത്.
