ചാത്തന്നൂർ. റിയാലിറ്റി ഷോയായ ബിഗ് ബോസിലെ താരവും നടനുമായ ഫിറോസ് ഖാന്‍റെ നിര്‍മാണത്തിലിരിക്കുന്ന വീട് അടിച്ചു തകര്‍ത്തതായി പരാതി.
ഇത് സംബന്ധിച്ച് നടന്‍റെ ഭാര്യ ചാത്തന്നൂർ ശാന്തിനഗർ എടി എസ് ഹൗസിൽ സജന ഫിറോസ് ചാത്തന്നൂർ പോലീസിന് പരാതി നല്കി.
വീട് നിര്‍മാണത്തിന് കരാറെടുത്ത കോണ്‍ട്രാക്ടറാണ് വീട് അടിച്ചു തകര്‍ത്തത് എന്നാണ് ഫിറോസും ഭാര്യ സജനയും ആരോപിക്കുന്നത്. കരാറുകാരനെതിരെയാണ് പോലീസിൽ പരാതി നല്കിയിരിക്കുന്നത്.
ഫിറോസിന്‍റെയും സജനയുടേയും നിർമാണം പൂർത്തിയായിവരുന്ന ചാത്തന്നൂരിലെ വീടിനുനേരെയാണ് ആക്രമണം ഉണ്ടായത്. കഴിഞ്ഞ ദിവസം രാത്രി ഒന്പതോടെയാണ് സംഭവം.
വീടിന്‍റെ നിര്‍മാണം അവസാനഘട്ടത്തിലായിരുന്നു. കൊല്ലം സ്വദേശിയായ കോണ്‍ട്രാക്ടര്‍ ഷഹീര്‍ പറഞ്ഞുറപ്പിച്ച തുകയേക്കാള്‍ മൂന്നു ലക്ഷം രൂപ അധികം ആവശ്യപ്പെട്ടെന്നും ഇതു നല്‍കാതിരുന്നതിലുള്ള പ്രതികാരത്തിന് വീട് അടിച്ചു തകര്‍ക്കുകയുമായിരുന്നുവെന്നാണ് ഫിറോസും സജനയും പറയുന്നത്.
എന്നാല്‍, വീട് അടിച്ചു തകര്‍ത്തുവെന്ന ആരോപണം കോണ്‍ട്രാക്ടറായ ഷഹീർ നിഷേധിച്ചു. സംഭവവുമായി തനിക്ക് യാതൊരു ബന്ധവുമില്ലെന്നും ഷഹീർ വ്യക്തമാക്കി. സംഭവത്തില്‍ പോലീസ് അന്വേഷണം ആരംഭിച്ചിട്ടുണ്ട്.
